Бу ҳақда Қирғизистон Омбудсмени аппарати бошлиғи Аскат Азарбеков Бишкекда ўтган матбуот анжуманида маълум қилди.
“Тергов ҳолис ва адолатли олиб борилади, деб бизни ишонтиришди. Қозоғистон бу жиноят ишларини Қирғизистон билан ҳамкорликда тергов қилишга қарши эмас”,-деди расмий.
Жиҳозсоз уста бўлган Чўлпўнбек Сидиқов 8 январь куни Олмаотадан Бишкекка қайтаётганда қўлга олинган эди. Унинг икки оёғи синдирилган, мияси чайқалган. У январь охирида ҳукумат аралашуви билан Бишкекка олиб келинган ва касалхонага ётқизилган.
Машҳур мусиқачи, пианист Викрам Рузахунов ҳам 8 январда Олмаотада қўлга олинган. У қийноқлар остида Қозоғистон телеканалига “Қозоғистонга вазиятни издан чиқариш учун келганини ва бунинг учун ҳақ олганини” айтишга мажбур бўлган.
Мана шу интервью эълон қилинганидан сўнг, қирғиз ва қозоқ жамоатчилиги машҳур мусиқачини таниб қолган. Бунинг ортидан қозоқ полицияси Қирғизистон ҳукумати талаби билан уни қамоқдан бўшатишга мажбур бўлган.
Рузахуновни сўроқ қилган қозоқ ҳуқуқ-тартибот идоралари ходимлари унинг қовурғаларини синдирган.