Депутатлар муҳожирларга қўйилаётган тиббий кўрикдан ўтиш, бармоқ изини рўйхатга олиш ва суратга тушиш мажбуриятларидан хавотир билдирган. Дастан Бекешев ушбу янгиликлар муҳожир ишчилар учун қийинчилик туғдираётганини, бироқ муаммо давлат раҳбарлари даражасида муҳокама қилиниши кераклигини таъкидлади. «Мингдан ортиқ одам тиббий кўрикдан ўтиш учун навбатда турибди, бунинг учун 6 минг рубль ҳам керак. Бундан ташқари, ушбу процедура ҳар чоракда бажарилиши лозим», — деди у.
Депутатлар Жанар Акаев, Адахан Мадумаров, Бақит Торобоев ва Жусупбек Қўрғонбай ўғли ҳам шу мавзуда сўзга чиқдилар. Хусусан, Жанар Акаев бу масалада жим турган Қирғизистоннинг ЕОИИдаги вакилларини танқид қилди. «Қирғизистонни қандай ривожлантиришни ўргатганлар ҳозир жим ўтирибди. Яъни, улар ишлашлари керак эди. Ушбу қонун Россия Давлат Думасида кўриб чиқилгач, уларнинг ҳеч бири бунга муносабат билдирмади. Бизнинг профиль қўмитасимиз бу талаблар ЕОИИга аъзо мамлакатлар фуқароларига тааллуқли бўлмаслиги учун тегишли хат юборди, шунда Россия Федерациясидаги ватандошларимизга анча осон бўларди», — деди депутат.
Эслатиб ўтамиз, 2021 йил 29 декабрдан бошлаб Россияга ишлаш учун келаётган чет эл фуқаролари, шу жумладан қирғизистонликлар ҳам 30 кун ичида тиббий кўрикдан ўтиши ҳамда бармоқ изини давлат рўйхатидан ўтказиш ва суратга олиш тартиб-қоидаларидан ўтиши шарт. Тиббий кўрик доирасида чет эл фуқароларининг гиёҳванд воситалари ёки психотроп моддаларни истеъмол қилиш қилмаслиги, шунингдек, юқумли касалликлар мавжудлиги текширилади.