Бу ҳақда 16 февраль куни Бош прокуратура брифингида маълум қилинди.
Бош прокуратуранинг Жиноий жазолаш хизмати бошлиғи ўринбосари Елдос Қилимжановга кўра, 16 февраль ҳолатига январь воқеаларига алоқадорликда гумон қилинган 741 киши ҳибсда тутилмоқда. Улардан 113 нафари муқаддам судланган ва 35 нафари “уюшган жиноий гуруҳ аъзолари” бўлса, 42 нафари номи айтилмаган “тақиқланган экстремистик ҳаракатлар”га мансублиги билдирилган.
Бош прокуратура қайдича, январь воқеалари бўйича 3096 та иш тергов қилинмоқда. Уларнинг асосий қисми мулкка қарши жиноятлар, безорилик, қуролларни талон-торож қилиш фактлари юзасидан очилган. Қилимжанов маҳбусларнинг аксарияти “олий маълумоти ва доимий иш жойи йўқ” ёшлар эканини айтган.
Шундан 181 та жиноят иши “оммавий тартибсизликлар” ва “террорчилик ҳаракатлари” бўйича қўзғатилган.
Қилимжановга кўра, 157 шахсга нисбатан қамоқ эҳтиёт чораси янгилроқ чорага ўзгартирилган, 103 киши эса “тартибсизликларга алоқаси йўқлиги аниқлангач”, озод этилган.
Қозоғистон ИИВ тергов департаменти бошлиғи Санжар Адилов “полиция ходимларининг хизмат ваколатларини суиистеъмол қилиши” фактлари юзасидан тушган 59 та ариза бўйича жиноят ишлари очилгани, 18 та аризада кўрсатилган ҳолатлар тасдиқланмаганини айтган.