15 ақпанда Өзбекстанның әділет министрлігі елдің тұңғыш президенті Ислам Каримовтің қызы Гүлнараның шетелдегі барлық активі елге қайтарылуы үшін БҰҰ жанынан көп тарапты сенім қоры құрылады деп мәлімдеген.
Мекеме мәлімдемесінде, бұл қаражат елдің әл-ауқатын көтеру үшін әлеуметтік салаға жұмсалады деген.
Жақында Франциядан 10 миллион доллар аударылған. Енді қалған 131 миллион доллар қайтарылуы үшін БҰҰ жанынан сенім қоры құрылмақ.
Гүлнара Каримованың активтерін қайтару жөніндегі Uzbek Asset Return Network құқық қорғау ұйымдарының коалициясы көп тарапты сенім қорының құрылуын құптады. Бірақ олар бұл процесс барынша ашық жүруі керек, әрбір жұмсалған тиынға есеп беріліп отыруы тиіс дейді.
Топ мәлімдемесінде, оралған қаржы тағы да жемқорлық топтың қолына түспеуі үшін, азаматтық белсенділер мен тәуелсіз аудиторлар тартылуы тиіс деп есептейді.
Ұлыбританияда тұратын өзбек сарапшысы Алишер Ильхамов көп тарапты сенім қорының құрылуына оң баға береді. Бірақ ол Өзбекстанда ашықтықтың жоқ екенін есепке алып, бұл процестің қалай жүзеге асатынын түсінбейтінін жеткізеді.
2015 жылдың тамыз айында Гүлнара Каримова салықтан жалтарды деген айыппен ұсталып, қамауға алынған. 2017 жылы оған қосымша айыптар тағылып, он жылға бас бостандығынан айырылған. Қазір ол Өзбекстан түрмесінде отыр.