Ссылки доступа

Қирғизистон меҳнат мигрантлари учун янги тартиб жорий этилиши ортидан Россияга нота йўллади


Қирғизистоннинг Россиядаги элчихонаси мамлакатда тиббий кўрикдан ўтиш ва дактилоскопик маълумотларни қайд эттириш назарда тутилган янги миграция қоидалари кучга киргани ортидан Россия Ташқи ишлар вазирлигига нота йўллаганини билдирди, дея хабар қилди Озодликнинг қирғиз хизмати.

Элчихона матбуот хизмати хабарномасида таъкидланишича, Москва шаҳри ва Москва вилоятида узун навбатлар пайдо бўлгани туфайли мигрантлар ушбу тартиб-таомиллардан ўтишда қийинчиликларга дуч келишмоқда.

“РФ Ташқи ишлар вазирлигига тиббий кўрикдан ўтказиш, дактилоскопик маълумотларни қайд этиш ва фотосуратга олишга масъул идораларда, жумладан Сахарово миграция марказида ЕОИИга аъзо мамлакатлар фуқаролари учун алоҳида йўлак очишда кўмаклашиш сўраб нота йўлланди”, дейилган қирғиз дипломатлари хабарномасида.

Россияда ўтган йилнинг 29 декабридан кучга кирган янги тартибга мувофиқ, мамлакатга ишга келган чет эл фуқаролари 30 кун ичида тиббий кўрик ва давлат дактилоскопик қайдидан ўтишлари ва фотосуратга тушишлари шарт. Тиббий кўрик чоғида хорижий давлат фуқаросининг наркотик ёки психотропик моддалар истеъмол қилиш-қилмаслиги, юқумли касалликлари бор-йўқлиги текширилади.

Аввалроқ Қирғизистон парламенти депутатлари қирғиз мигрантларининг Россия ҳудудида бўлишига доир қонун-қоидалар масаласини кўтаришган ва уни давлат раҳбарлари даражасида муҳокама қилишни таклиф этишган эди.

XS
SM
MD
LG