Расман билдирилишича, “Ўзагроэкспортбанк”нинг давлат акция пакетини сотиб олишга 4 талабгор қизиқиш билдирган. Аммо Давлат активларини бошқариш агентлиги бирорта талабгор тўғрисида очиқ маълумотларни бермаган.
Хабарда 4 талабгор ичидан “Совкомбанк”ка давлат акцияларини сотиш тўғрисида қарор қилингани таъкидланган, холос.
Очиқ маълумотларда қайд этилишича, “Совкомбанк” Россиядаги энг йирик банклар ўнлигидан жой олган. 2021 йилнинг 30 сентябрида унинг активлари 1,9 триллион рублни, капитали эса 224 миллиард рублни ташкил қилган. Банкнинг Россиядаги 2300 та филиалида 23 минг ходим 12 миллион мижозга хизмат кўрсатади.
2017 йилда ташкил этилган “Ўзагроэкспортбанк” 2021 йил якунида 69 миллиард сўмлик активларга эгадорлик қилган.
“Ўзагроэкспортбанк”нинг “Совкомбанк”ка сотилиши АҚШ, Британия ва Европа Иттифоқи Россиянинг қатор банкларига санкциялар жорий қилган бир вақтга тўғри келди.
Санкциялар жорий этилган банклар орасида “Совкомбанк” тилга олинмаган.