Намойишга чиққан ишчилар ўз талабларини корхона раҳбариятига ёзган жамоавий мурожаатида билдирганликларини маълум қилишди. Улар талаблар бажарилмаса, Қозоғистон президенти Қасим-Жомарт Тоқаевга ҳам мурожаат қилиш ниятида эканликларини билдиришмоқда.
«Оңтүстік ВГ» ГРЭ-7 корхонасининг бурғилаш устаси Нурлан Бековнинг айтишича, у корхонада 20 йилдан ортиқ меҳнат қилади. Унинг маоши 140 000 тенге (300 доллар). Бу пулга яшаш қийин, дейди Беков.
– Корхонада ишчиларнинг ойлик маоши 65-140 минг тенгени ташкил этади. Режани 100 фоиз бажариш учун мукофот бор, лекин уни тўлиқ бажаришнинг иложи йўқ, дейди у.
Ходимларнинг таъкидлашича, «Оңтүстік ВГ» ГРЭ-7 филиалида мингдан ортиқ киши ротацион усулда меҳнат қилмоқда. Айни пайтда корхонада 500 нафар ишчи ишини тўхтатган. Қолганлари сменалараро дам олишда. Ишчилар Озодликка юборган видеода юзлаб ишчилар норозилик билдирмоқда.
— Ҳайдовчи ёрдамчиси бўлиб ишлайман. Бир ойда 15 кунлик ротация асосида ишлаганим учун 83 минг тенге оламан. Бу яшаш учун етарли эмас», деди Озодлик билан суҳбатда ишчи Илҳомжон Абилаев.
Озодлик радиосининг «Оңтүстік ВГ» ГРЭ-7 филиалидан изоҳ олишга уринишлари муваффақиятсиз тугади.
Компания сайтидаги маълумотларга кўра, совет даврида яратилган “Волковгеология” корхонаси 1997 йилда “Казтомпром” таркибига киритилган ва тўртта филиалга эга. Улардан бири ГРЭ-5, ГРЭ-7, ГРЭ-23 қидирув экспедициялари таркибида Онтустик ВГ ҳисобланади. Компания уран конларини қидириш, уларни ишга тушириш ва технологик бурғилаш билан шуғулланади. Корхонада жами тўрт мингдан ортиқ киши ишлайди.