Қирғизистон Республикаси Ташқи ишлар вазирлиги матбуот хизмати хабарига кўра, 68 нафар катталар, 5 нафар талаба ва 34 нафар вояга етмаганлардан иборат ушбу биринчи эвакуация колоннаси 28 февраль куни Бишкек вақти билан соат 18:00да Киев шаҳридан автобусда Украина-Венгрия чегараси томон йўлга чиққан.
«Қирғизистон Республикасининг Украинадаги элчихонаси ходимлари бутун йўналиш бўйлаб фуқароларга ҳамроҳлик қилишади. Украина-Венгрия чегарасини кесиб ўтиш масаласи бўйича ишлар Қирғизистон Республикасининг Венгриядаги элчихонаси билан ҳамкорликда олиб борилмоқда», — деб ишонтирди ТИВ.
Қирғизистон Республикасининг Украинадаги элчиси Идрис Қодирқулов ўзининг Фейсбукдаги саҳифасида қирғиз халқининг кетиши акс этган видеолар билан бўлишди.
Ташқи ишлар вазирлиги Қирғизистон Республикасининг Венгриядаги элчихонаси ходимлари зарур ёрдам кўрсатиш учун эвакуация қилинганларни Венгрия-Украина чегарасида кутиб олишини қўшимча қилди. Бундан ташқари, дипломатик ваколатхона Қирғизистон Республикаси фуқароларини чегарадан Будапешт халқаро аэропортига етказишни ташкил этиш билан шуғулланади.
ТИВ маълумотларига кўра, аввалроқ 12 нафар Қирғизистон фуқароси Украинадан Полшага, 16 нафар фуқаро Молдовага ва 6 нафар фуқаро Руминияга кетган. Бундан ташқари, Қирғизистон Республикасининг 18 нафар фуқароси Харков шаҳридан Лвов шаҳрига поездда жўнатилди.