Россия ҳужумидан олдин қандолат моллари учун Украина пойтахтига келган Оқтўбе шаҳрида яшовчи Олег Броммер Озодликка Киевдан 30 километр узоқликда эканини айтди.»Бир неча кундан буён биз видеомурожаатларни ёзиб, ваколатли органлардан ёрдам сўраяпмиз. Реакция йўқ. Давлат бизни унутганга ўхшайди», — дейди Олег Броммер.
Можаро ҳудудида Оқтўбе вилоятидан камида 11 та юк машинаси бор. Улардан иккитаси БекАс компаниясига тегишли бўлиб, транспорт воситалари Украинанинг Дубно ва Пирятин шаҳарларида қолиб кетган. Ҳайдовчиларнинг сўзларига кўра, хавфсизлик нуқтаи назаридан юкланган маҳсулотлар заводга қайтарилган.
— Биз ҳайдовчилар билан доимий алоқадамиз. Пирятин шаҳрида вазият барқарор. Дубнода эса вазият ёмонлашмоқда. «Армия эҳтиёжлари учун захира яратиш» мақсадида у ердаги дўконлар бегоналарга маҳсулот сотмаяпти, дейди БекАс компанияси директори Берик Жиенкулов.
Унга кўра, Украинада уруш бошланганидан бери божхона ва бошқа хизматлар иши тўхтатилган. Шу муносабат билан ташувчилар товарларни расмийлаштиришга улгурмай қолган. Қозоғистонлик юк ташувчилардан бири Кропивнитский шаҳрида қишлоқ хўжалиги техникалари учун эҳтиёт қисмлар сотиб олиб, божхона хизматининг қайта ишланишини кутмоқда.
— Биз Украинанинг марказидамиз, бу ерда нисбатан тинч. Биз олган маҳсулотларни заводга қайтармоқчи эдик, лекин заводда қоровулдан бошқа ҳеч ким йўқ. Менимча воқеалар натижасини кутишга тўғри келади», — дейди Беркин (суҳбатдошнинг илтимосига биноан исм ўзгартирилди).
Россия 2022 йил 24 февралда Украинага бостириб кирди. Украинанинг турли минтақаларида, жумладан Киевдан бир неча километр узоқликда Россия армияси ва Украина Қуролли кучлари ўртасида жанглар давом этмоқда. Россия расмийлари махсус операция деб атаган беш кунлик жангларда, эҳтимол, минглаб одамлар ҳалок бўлган. Ҳар икки томондан ўлганларнинг аниқ сони номаълум.
Россия қўшинлари босқинидан кейин Украинага келган қозоқлар учун Полша орқали эвакуация ташкил этилди, бу Қозоғистоннинг Украинадаги элчихонаси маълумотларига кўра, бир неча босқичда амалга оширилади. 28 февраль куни қозоқлар билан биринчи рейс кечки пайт Олмаотага етиб келди.