«Бизнинг позициямиз давлатимиз хавфсизлиги, суверенитети ва ҳудудий яхлитлигини таъминлашнинг муҳим заруратидан келиб чиқиши керак. 2010 йилда ЙХҲТ саммитига мезбонлик қилган давлат сифатида биз Евросиё хавфсизлигининг ажралмаслиги тамойилини таъкидлаймиз. Бу ҳақда 10 февраль куни Москвага ташрифим чоғида ҳам айтиб ўтгандим», — деди Тоқаев бугун номи “Аманат” партиясига ўзгартирилиши эълон қилинган ҳукмрон «Нур Отан» партиясининг қурултойида.
Тоқаевнинг айтишича, бўлинмаслик ва умумий хавфсизлик тамойили ишончга асосланган ўзаро тушунишни назарда тутади.
— Афсуски, бундай бўлмади. Минск келишувлари қоғозда қолди, бу эса Украина ҳудудида ҳарбий ҳаракатларга олиб келди. Геосиёсий вазият мисли кўрилмаган даражада ёмонлашди. Ва энди, афсуски, бу тенденциянинг қайтариб бўлмайдиганлиги ҳақида гапириш вақти келди. Шунинг учун биз ҳар икки давлатни музокаралар столида умумий тил топишга, битим ва келишувга эришишга чақирамиз. Бошқа йўл йўқ. Яхши жанжалдан ёмон тинчлик яхшироқдир. Тинчлик бўлмаса, тараққиёт бўлмайди. Қозоғистон, ўз навбатида, ҳар қандай ёрдамни, жумладан, воситачилик хизматларини ҳам кўрсатишга тайёр, албатта, агар керак бўлса, деди Тоқаев.
Қозоғистон президенти 24 февраль куни Россиянинг қўшни давлатга қуролли бостириб кириши бошланганидан кейин Украинадаги вазият ҳақида илк бор сўз очган эди. 25 февраль куни Қасим-Жомарт Тоқаев Нур-Султонда Евросиё иқтисодий иттифоқи мамлакатлари ҳукумат раҳбарлари билан учрашувда иттифоқ мамлакатларига «кечаётган геосиёсий кескинлик фонида биргаликда иқтисодий чора-тадбирлар ишлаб чиқишни таклиф қилди. У санкциялар можароси натижасида ЕОИИ мамлакатлари иқтисодиёти ва молиявий тизимлари учун салбий оқибатлар ҳақида гапирди, лекин Украинадаги уруш ҳақида гапирмади.
Россия 2022 йил 24 февралда Украинага тўлиқ миқёсли босқинни бошлади. Украинанинг турли минтақаларида, жумладан Киевдан бир неча километр узоқликда Россия армияси ва Украина Қуролли кучлари ўртасида жанглар давом этмоқда. Ҳар икки томондан ҳам ўлганларнинг аниқ сони номаълум.