Ссылки доступа

Москвада Украина элчихонасига гул олиб борган беш болакай оналари билан тутиб кетилди


Москвада полиция Екатерина Завизион ҳамда Ольга Альтерни уларнинг беш фарзанди билан бирга қўлга олди. Бу ҳақда “Фейсбук”да антрополог Александра Архипова маълум қилди.

Аёллар Украина элчихонаси олдига гул қўйишмоқчи бўлган, болалар эса (уларнинг энг каттаси 11 ёшда) ўзлари чизган “Битсин уруш” ёзувли плакатни кўтариб олишган эди.

Она-болаларнинг барчасини тутиб кетган полициячилар дастлаб уларни автозакда сақлашган, сўнгра ИИБга келтиришган ва телефонларини олиб қўйиб, эрталабгача ҳибсда сақламоқчи бўлишган. Аммо адвокат етиб келиб, ярим тундан кейин оналар билан болаларни ИИБдан олиб чиққан.

Полиция бўлимида Екатерина ва Ольгага ота-оналик ҳуқуқидан маҳрум этиш билан таҳдид қилишган. Уларга нисбатан маъмурий баённома тузилган, лекин маъмурий иш айнан қайси моддага кўра очилгани маълум эмас.

Россияда урушга қарши кўча акциялари тўхтагани йўқ. “ОВД-Инфо” маълумотига кўра, урушнинг олтинчи кунида полиция 32 та шаҳарда камида 307 кишини қўлга олган. Биргина Санкт-Петербургнинг Гостиний Двор майдонида юздан ортиқ киши ушланган. Уруш бошланганидан бери қўлга олинганлар сони 6820 нафарга етган.

Екатеринбургда махсус ҳибсхоналарда жой қолмагани, янги маҳбуслар Свердлов вилоятига жўнатилаётгани айтилмоқда.

Москва мэри Сергей Собянин “кўча тартибсизликларини уюштиришга уринишлар изчиллик билан бартараф этилиши” ҳақида огоҳлантирган.

XS
SM
MD
LG