Ссылки доступа

Назарбоев дипломатик форумда иштирок этиш учун Анталияга келди


Қозоғистоннинг собиқ президенти Нурсултон Назарбоев Туркия президенти Ражаб Тойиб Эрдўғоннинг таклифига биноан дипломатик форумда иштирок этиш учун 9 март куни Анталияга келди, деб хабар берди унинг матбуот котиби Айдос Укибай.

Матбуот котиби Твиттерда собиқ президентнинг коридорда тушган суратини жойлаштирди.

10 март, пайшанба куни Анталияда Украина ташқи ишлар вазири Дмитрий Кулеба ва Россия ташқи ишлар вазири Сергей Лавров ўртасида учрашув бўлиб ўтиши кутилмоқда. Агентлик таъкидлаганидек, учрашув ташаббуси Туркия раҳбарига тегишли эди.

Шу ҳафта бошида Украина ташқи ишлар вазирлиги раҳбари россиялик ҳамкасби билан музокаралар «мазмунли» бўлса, ўтказишга тайёрлигини маълум қилган эди. Бу Россия ва Украина расмийларининг Россиянинг Украинага кенг кўламли бостириб кириши бошланганидан бери бундай даражадаги биринчи учрашувидир. Аввалроқ икки давлат махсус делегациялари музокаралар учун Беларусда уч марта учрашган эди.

Бу Назарбоевнинг январь ойидаги қонли воқеалардан тахминан бир ҳафта ўтиб, биринчи марта хорижга расмий сафари бўлиб, у ўзини видеотасвирда «2019 йилдан бери нафақахўр» эканлигини ва бутун ҳокимият Қасим-Жўмарт Тўқаевда эканлигини маълум қилди.

Январь ойи бошида Манғистау вилоятининг Жанаўзен шаҳрида суюлтрилган газ нархининг ошиши сабаб бўлиб ўтган норозилик намойишлари тезда мамлакатнинг бошқа ҳудудларига ва қатор шаҳарларга, жумладан, Олмаотага ҳам тарқалди ва бу қон тўкилишига олиб келди. Расмий равишда 227 киши, жумладан 19 хавфсизлик ходими ҳалок бўлди.

Январь ойида намойишчиларнинг норозилиги асосан собиқ президент Нурсултон Назарбоевнинг сиёсий мероси, тотал коррупция ва адолатсизликка қаратилган эди. Кўпчилик Назарбоев 2019 йилда истеъфога чиқиб, президентлик лавозимини ўзининг ҳимоячиси Қасим-Жомарт Тўқаевга ўтказганидан кейин ҳам давлат аппаратига таъсир қилишда давом этганини таъкидлади.

2022 йил январь воқеаларидан сўнг собиқ президентнинг яқин қариндошлари ва сафдошлари ўз лавозимларидан айрилди, унинг ўзи умрбод Хавфсизлик кенгашига раислик қилиш ҳуқуқидан маҳрум қилинди, у ҳақидаги маълумотлар кескин қисқарди.

XS
SM
MD
LG