Ссылки доступа

Қозоғистон энергетика вазири: Россияга қарши санкциялар қозоқ нефтига таъсир қилмайди


Қозоғистон энергетика вазири Болат Акчулаков пайшанба куни ҳукумат мажлисида журналистлар саволларига жавоб берар экан, Россияга қарши санкциялар қозоқ нефтига ҳеч қандай таъсир кўрсатмаслигини айтди.

«Қозоқ нефтига қарши ҳеч қандай санкциялар йўқ, худди принципиал жиҳатдан Россия нефтига ҳам санкциялар йўқ. Бу Россия Федерацияси ҳудудида ташиш учун мўлжалланган», — деди Акчулаков.

Унинг қўшимча қилишича, ҳозирча на Россия орқали ўтадиган нефть қувурлари тармоқларида ва на Қозоғистон нефтига нисбатан ҳеч қандай тақиқ ёки санкциялар мавжуд эмас.

Акчулаков бу йил Қозоғистон нефть экспорти қисқаришини кутмаслигини айтди. Унинг сўзларига кўра, мамлакатда бу йил ҳам 87,5 миллион тонна нефть қазиб олиш режалаштирилган.

Қозоғистон нефтини экспорт қилиш йўллари ҳақида гапирар экан, вазир «турли хил вариантлар кўриб чиқилаётганини» айтиб, Хитой ва Европани тилга олди.

«Ҳозирча ҳеч қандай санкциялар йўқ, шунинг учун биз ҳеч қандай ҳажмни қайта йўналтиришни кўриб чиқмаяпмиз. Биз одатдаги режимда келишилган ҳолда, КҚК (Каспий қувурлари консорциуми), Атирау-Самара орқали ишлаймиз», деди у.

Вазир экспортни Оқтау, Каспий денгизи ва Закавказ орқали Россияни четлаб ўтиш имкониятини эслатди, бироқ унинг сўзларига кўра, Энергетика вазирлиги бу вариантни «ҳали кўриб чиқмаяпти».

КҚК қувур линияси кунига тахминан 1,2 миллион баррель нефтни жаҳон бозорларига жўнатади.

Россиянинг Украинага бостириб кириши ва унинг ортидан Россияга қарши санкциялар жорий этилганидан буён уларнинг Қозоғистон иқтисодиёти ва савдо муносабатларига таъсири ҳақида саволлар пайдо бўлди.

XS
SM
MD
LG