Унинг сўзларига кўра, беш соат давом этган қизғин мунозаралардан сўнг Украинанинг Европа интеграциясига «ҳа» дейилган. «Жараён бошланди. Энди буни тезда амалга ошириш биз ва украиналикларга боғлиқ. Украина халқи уларни ЕИда хуш келибсиз деб билишга лойиқ», деб ёзади Науседа.
11 март, жумага ўтар кечаси Версалда бўлиб ўтган Европа Иттифоқининг норасмий саммити якунлари бўйича эълон қилинган баёнотда Еврокомиссия Украинанинг Европа Иттифоқига аъзо бўлиш аризаси бўйича хулоса бериши кераклиги ва шу вақтгача шериклик муносабатларини мустаҳкамлаш режалаштирилгани қайд этилган. «Украина бизнинг Европа оиламизга тегишли», — дейилади баёнотда.
Шу билан бирга, Еврокомиссиянинг баҳолаши узоқ вақт талаб қилиши мумкин, деди Нидерландия бош вазири Марк Рютте. «Европа Иттифоқига қўшилиш бўйича тезлаштирилган тартиб йўқ. Бу узоқ вақтдан бери аъзолик тартибига киришни кутаётган Черногория, Сербия, Албания ва Шимолий Македония учун шапалоқ бўлади», — деди у.
Европа Иттифоқи давлатлари уруш тугаганидан кейин «демократик Украинани тиклашни қўллаб-қувватлашга» ваъда берди. Якуний ҳужжатда қайд этилганидек, Европа Иттифоқи украиналик қочқинларга «гуманитар, тиббий ва молиявий» ёрдам кўрсатишда давом этади.
28 февраль куни Владимир Зеленский Украинанинг Европа Иттифоқига қўшилиши ҳақидаги аризани имзолади. Киев ҳужжат нусхаларини Европа кенгаши президенти Шарл Мишел, Европа комиссияси президенти Урсула фон дер Леен ва Европарламент раҳбари Роберта Метсолага юборди.