Ссылки доступа

Жанаўзенда бир гуруҳ ишсиз намойишчилар очлик эълон қилишди


Жанаўзен шаҳрида бир неча ишсиз намойишчилар 15 март куни очлик эълон қилди. Сабаби, нефть соҳасида доимий иш учун ишга жойлашиш талаблари ҳамон бажарилмаяпти, дейди улар.

Намойишчиларга кўра, ўтган ҳафта охирида полиция вакиллари келиб, митинг «ноқонуний» эканини айтишган, ўнга яқин одам полицияга чақирилган. Бироқ, одамлар норозилик акциясини тўхтатмадилар ва ҳокимлик олдига тўпланишда давом этишди.

Намойишчилар томонидан таҳририятимизга юборилган видеоларда қалин уст-бош кийиб олган бир неча киши, кўрпа-тўшак қилиб, ҳокимлик биноси олдига қўйилган ёғоч тагликларда очиқ ҳавода ётгани тасвирланган. Уларнинг ёнида яна ўнлаб намойишчилар тўпланиб олган.

«Биз Жанаўзен ҳокимлиги олдида турибмиз. Биродарларимиз ишсизлик учун очлик эълон қилишди. Ҳокимиятдагилардан муаммомизни тезроқ ҳал қилишларини сўраймиз. Жуда кўп биродарларимиз ишсизлик муаммоси билан бу ерга келиб, иш сўраяптилар», — дейди намойишга йиғилганлардан бири.

Яна бир видеода воқеа жойига етиб келган ҳамшира очлик эълон қилган иштирокчилардан бирининг босимини қандай ўлчаётганини кўриш мумкин.

Намойишчилар бир кун аввал Жанаўзен шаҳри ҳокими Мақсат Ибагаров номига ариза ёзган. Унда, 15-17 март кунлари улар очлик эълон қилишни режалаштираётганини билдиришган. «Биз “Ўзенмунагаз«да доимий, юқори маошли ишга жойлашишни сўрадик. 4 мартдан бери маҳаллий ҳокимият вакиллари бизни таъқиб қилиб, бу ҳаракатни ноқонуний деб, босим ўтказмоқда», — дейилади 14 март куни эълон қилинган баёнотда.

Бугун норозилик билдирган ишсиз аҳоли ҳокимлик биноси олдига тўплана бошлаганига 44 кун бўлди. Ўтган ҳафта намойишчилар «ноқонуний митингда иштирок этганлик» учун 488-маъмурий бўлим бўйича бир неча киши полицияга чақирилганини маълум қилган. Намойишчиларга кўра, уларга ўз талабларини сиёсийлаштираётгани айтилади, босим ва қўрқитиш ҳам иддао қилинади.

XS
SM
MD
LG