Ссылки доступа

Қирғизистонда депутат Шайирбек Ташиевга нисбатан очилган жиноий иш ёпилди


Жалолобод шаҳар суди Қирғизистон Республикаси Миллий хавфсизлик давлат қўмитаси раҳбари Қамчибек Ташиевнинг укаси Жогорку Кенеш депутати Шайирбек Ташиевга нисбатан ишни якунлади.

21 февраль куни қабул қилинган ушбу қарор, оммага 15 март куни маълум бўлди. Суд матбуот хизмати бу маълумотни тасдиқлади. Мавжуд маълумотларга кўра, давлат айбловчиси ишни тугатиш тўғрисида оғзаки илтимоснома киритган. Судья бу талабни қондирган.

Бу иш бўйича яна уч киши — Қамчибек Ташиевнинг қамоқдаги ўғли Абсаттар Сирғабоев, Женишбек Токторбоев ва Медербек Усенов айбланувчи сифатида иштирок этди. Улар Шайирбек Ташиев билан биргаликда «оммавий тартибсизликлар уюштирганлик» ва «конституциявий тузумни зўравонлик билан ўзгартиришга чақириш»да айбланган. Тергов маълумотларига кўра, айнан улар 2013 йилда Жогорку Кенешнинг ҳибсга олинган депутатлари Қамчибек Ташиев, Садир Жапаров ва Талантни озод этиш талаби билан Бишкек-Ўш йўлининг Барпи қишлоғига кираверишдаги йўлни тўсишни уюштирганлар.

Суд уларни шартли равишда уч йилга озодликдан маҳрум қилди. Аммо 2021 йилнинг май ойида Қирғизистон Республикаси Олий суди бу ҳукмларни бекор қилди ва ишни Жалолобод шаҳар судига кўриб чиқиш учун юборди ва бунгача «катта процессуал қонунбузарликлар» содир этилганини тушунтирди.

Қирғизистоннинг «Ата-Журт» партиясидан 7-чақириқ Жогорку Кенеш депутати бўлган Женишбек Токторбоев аввалроқ таҳририятимизга бу масала 2020 йилда бўлиб ўтадиган парламент сайловларигача қўйилганини айтган эди.

Абсаттар Сирғабаев 2021 йил июль ойидан буён Қирғизистон Республикаси Президентининг Жалолобод вилоятидаги ваколатли вакили лавозимида ишлаб келаётган эди.

XS
SM
MD
LG