Ссылки доступа

АҚШ Украинага 800 та ҳавога қарши мудофаа тизими ва бошқа ҳарбий воситаларни тақдим этади


АҚШ президенти Жо Байден Қўшма Штатлар Украинага қўшимча қурол-аслаҳа йўллашини маълум қилди.

Киев Вашингтондан ҳавога қарши мудофаа учун Stinger русумли 800 та зенит-ракета мажмуаси, 2 мингта Javelin русумли танкка қарши кўчма тизим, 100 та дрон, 100 та гранатомёт, 5000 та милтиқ, 400 та пулемёт ва бошқа аслаҳалар, шунингдек, ўқ-дори, бронежилет ва шлемлар олади.

“Бу узоқ давом этадиган ва оғир уруш бўлиши мумкин, бироқ Путиннинг тинч аҳолига ахлоқсизларча қилган ҳужуми олдида Америка халқи Украина халқини оғишмай дастаклаб туради”, дея қўшимча қилган Байден.

Унга кўра, буларнинг барчаси АҚШнинг Украинага энг замонавий қурол-аслаҳа йўллашдаги собитлигини намойиш қилади.

“Бу ишни ёлғиз биз қилаётганимиз йўқ. Бизнинг ҳамкорларимиз ва иттифоқчиларимиз ҳам Украинага хавфсизлик соҳасида ёрдам кўрсатиш бўйича саъй-ҳаракатларни кучайтиришди. Биз бу ишни давом эттирамиз. АҚШ ва иттифоқчилари Украинага кўмак беришни давом эттириш фикрида собит ва бу ёрдам кўлами янада кенгаяди”, деган АҚШ президенти.

Аввалроқ Украина президенти Владимир Зеленский АҚШ Конгрессининг ҳар икки палатасига видеомурожаат билан чиқиб, Қўшма Штатлар ва иттифоқчиларидан ҳавога қарши мудофаа соҳасида ёрдам сўраган эди.

XS
SM
MD
LG