Россиянинг Украинага қарши урушининг тўртинчи ҳафтасида асосий порт шаҳри Мариупол энг баҳсли жанг майдони бўлиб қолмоқда.
Украина президенти Владимир Зеленский Россиянинг Мариуполни таслим қилиш ҳақидаги ультиматумини рад этиб, Украина ҳеч қачон стратегик порти ва бошқа шаҳарлари, жумладан Харков ва Киевдан воз кечмаслигини айтди. «Украина Россиянинг ультиматумларини бажара олмайди. Бунинг учун улар аввал бизни йўқ қилишлари керак, кейин эса уларнинг ультиматуми бажарилади», деди у 21 март куни кечқурун.
Томонлар ўт очишни тўхтатиш тўғрисидаги келишув шартларини ишлаб чиқиш бўйича видеоалоқа кўринишида музокаралар олиб бормоқда. Зеленский урушни тугатиш учун Россия президенти Владимир Путин билан «исталган форматда» учрашиш зарурлиги ҳақида гапирди. «Ушбу учрашувсиз улар урушни тугатиш учун нима қилишга тайёр эканликларини тўлиқ англаб бўлмайди, деб ўйламайман», деди Зеленский.
Шунингдек, у россияликлар билан музокараларда эришилган ҳар қандай муроса Украина халқи томонидан референдумга қўйилишини таъкидлади.
Зеленский 22 март куни Италия парламентига видеомурожаат билан чиқади. Украина раҳбари ҳарбий ёрдам сўраб бир қанча давлатларга, жумладан АҚШ, Канада, Германия ва Исроилга мурожаат қилди.
Сўнгги икки ҳафта давомида Россия Азов денгизидаги муҳим порт шаҳри Мариуполни қамал қилди. Шаҳар устидан назорат ўрнатилса, 2014 йилда Москва томонидан босиб олинган Қрим Украина шарқидаги Кремль томонидан қўллаб-қувватланган айирмачилар ҳудуди билан қуруқлик орқали боғланади.
Уруш бошланишидан олдин 400 минг аҳолига эга бўлган Мариупол шаҳри ўтган икки ҳафта давомида сув, озиқ-овқат ва ёқилғи каби асосий ресурслардан маҳрум бўлган.
Расмийларнинг айтишича, Мариуполда камида 2300 киши ҳалок бўлган, қурбонларнинг бир қисми оммавий қабрларга дафн этилган.
Россия охирги кунларда ҳужумларни кучайтирди. Портлашлар шифохоналар, квартиралар ва театрларни вайрон қилди.