Хусусан, Руминия, Болгария, Венгрия ва Словакияда НАТОнинг янги жанговар гуруҳлари жойлаштирилади.
НАТО Бош котиби Енс Столтенберг саммитдан кейин ўтказилган матбуот анжуманида альянс Украинани, хусусан, қурол-яроғ ва техника етказиб беришда ёрдам беришда давом этишини айтди. У, шунингдек, Россияни кимёвий қурол ёки бошқа оммавий қирғин қуролидан фойдаланиш оқибатлари ҳақида огоҳлантирди.
Шу билан бирга, НАТО раҳбари иттифоқчилар ҳали ҳам можаронинг янада кучайишига қарши эканини, улар Украинага қўшин жўнатмасликларини ва парвозлар тақиқланган ҳудудни жорий қилмасликларини айтди. Унинг таъкидлашича, бу НАТО ва Россия қўшинлари ўртасидаги тўғридан-тўғри тўқнашувга таҳдид солади. Аввалроқ Полша Украинага тинчликпарвар миссия юборишни таклиф қилган, бироқ бу таклиф саммитда фаол муҳокама қилинмаган.
Украина Шимолий Атлантика альянсидан президент Владимир Зеленский аввалроқ сўраган қуролларни оладими ёки йўқми деган тўғридан-тўғри саволга Столтенберг тафсилотларни ошкор қилмаслигини айтди.
НАТО етакчилари баёнотида Россиянинг Украинага қарши тажовузкорлиги қораланади, шунингдек, ҳарбий ҳаракатларни зудлик билан тўхтатиш ва Украина ҳудудидан қўшинларни олиб чиқишга чақирилади. «Украиналиклар Россиянинг шафқатсиз босқинчилик урушига қарши қаҳрамонона қаршилик кўрсатиши билан дунёни илҳомлантирди», — дейилади баёнотда.
«Президент Путиннинг Украинага ҳужум қилиш қарори Россиянинг ўзи ва унинг халқи учун жиддий оқибатларга олиб келадиган стратегик хатодир», — дея таъкидлайди НАТО етакчилари.
Аввалроқ, Украинадаги қуролли можаро муносабати билан Столтенбергнинг НАТО бош котиби ваколати бир йилга, 2023 йилнинг кузигача узайтирилиши маълум қилинганди.