Ссылки доступа

Шинжондаги қариндошлари билан бирлашишни талаб қилган фаоллар Олмаотада яна ҳибсга олинди


29 март куни Олмаотада Хитой консуллиги яқинида полиция Хитойнинг Шинжон вилоятида ҳибсда сақланаётган ёки чиқиб кетиш ҳуқуқига эга бўлмаган қариндошларини қайтаришни талаб қилган бир гуруҳ шахсларни қўлга олди, деди Озодлик мухбирига фаол Байболат Кунбўлатули.

- Улар консулликка мурожаат қилишлари биланоқ, ҳокимлик вакили уларнинг ҳаракатини «ноқонуний» эканлигини айтди. Аёллар бундан 15 кун олдин ҳокимликка бориб, ҳоким Ерболат Дўсаевга хат қолдиришган. Хатда ҳокимдан уларни қабул қилиш сўралган ва яқинлари Шинжондан қайтарилгунига қадар Хитой консуллиги олдида акциялар ўтказиш ниятлари ҳақида маълум қилинган. Афсуски, ҳеч қандай жавоб, шунингдек, рухсат бўлмади. Шунга қарамай, милиция ходимлари уларни олиб кетишди», — деди Байболат Кунбўлатули.

Унга кўра, Холида Акитхон, Гулфия Қозибек, Нурзат Ермекбай ва Гулбаран Омирали қўлга олинган. Улар Медеу туман ИИБга олиб кетилган. Гулфия Қозибекнинг ёнида олти яшар ўғли бўлган.

Озодлик мухбири Олмаота полиция департаменти ва Жамоатчиликни ривожлантириш департаменти матбуот хизматидан изоҳ ололмади.

Фаол Байбўлат Кунбўлатули ҳам бир кун аввал полиция Хитой консуллиги олдида Шинжондан қариндошларини қайтаришни талаб қилиб келган одамларни ҳибсга олгани ҳақида хабар берган эди.

Шинжондаги қариндошлари билан учрашишни талаб қилиб, улар ўша ерда «сохта» айбловлар билан қамалган ёки мамлакатда мажбуран ушлаб турилганлар 2021 йил февралидан бери Хитойнинг Олмаотадаги консуллигида пикет ўтказмоқда.

Ҳаракатлар давомида Хитой дипломатлари намойишчилар олдига чиқмаган, уларни элчихона ёки консулликда қабул қилмаган. Хитойнинг Қозоғистондаги элчиси Чжан Сяо ўтган йилнинг март ойида Шинжонда қўлга олинганлар «Хитой фуқаролари» эканлигини ва «Хитой қонунларини бузганини» айтган эди. Намойишчилар хитойлик дипломатнинг бу баёнотини кескин қоралаб, уни мамлакатдан чиқариб юборишни талаб қилишди.

Халқаро ташкилотлар ва Ғарб давлатлари Пекинни Шинжондаги уйғурлар, қозоқлар, қирғизлар ва бошқа маҳаллий этник гуруҳлар вакилларига қарши «геноцид» содир этишда айбламоқда. Пекин буни рад этади.

XS
SM
MD
LG