Путинга кўра, Ғарб мамлакатлари Россия газига ҳақ тўлаш учун “Газпромбанк”да ҳисобрақами очишлари керак бўлади. Бу тартиб 1 апрелдан кучга киради.
Ҳужжатда хорижлик харидорлар аввалгидек “Газпромбанк”даги махсус валюта ҳисобрақамларига чет эл валютасида пул ўтказишлари мумкинлиги, кейин банк бу валютани Москва биржасида сотиши, рублга алмаштирилган хорижий валюта хорижлик мижознинг “Газпромбанк”даги рубль ҳисобрақамига ўтказилиши, сўнгра бу пул “Газпром”нинг рублдаги ҳисобрақамига ўтказилиши айтилган. Бошқа банкка пул ўтказганларга “газ сотиш тақиқланган”.
Расмий Париж ва Берлин Путиннинг газ учун рублда ҳақ тўлашга оид шартини қабул қилмаслигини билдирган.
Франция молия вазири Брюно Ле Мэрга кўра, Россия билан газ шартномалари еврода тузилган, шунинг учун газ ҳақи фақат еврода тўланади, холос.
Россия томонидан “дўст бўлмаган мамлакатлар” ўлароқ эълон қилинган давлатларга АҚШ, Чехия, Канада, ЕИ мамлакатлари, Бубк Британия, Украина, Черногория, Швейцария, Албания, Андорра, Исландия, Лихтенштейн, Монако, Норвегия, Сан-Марино, Шимолий Македония, Япония, Жанубий Корея, Австралия, Микронезия, Янги Зеландия, Сингапур ва Тайвань кабилар киради.