Бу ҳақда президент Шавкат Мирзиёев макроиқтисодий барқарорликни таъминлаш, бизнесни қўшимча қўллаб-қувватлаш масалалари юзасидан 31 март куни Тошкентда ўтказилган видеоселектор йиғилишида билдирган.
Президент матбуот котиби Шерзод Асадов телеграм-канали орқали тарқатилган маълумотга мувофиқ, Мирзиёев йиғилишда март бошида “шакар нархи асоссиз ошган”ига эътибор қаратган. Айни пайтда у ўтган ҳафталар мобайнида ички бозорда мўътадиллик таъминлангани, валюта бозори ва айирбошлаш курси барқарорлашганини урғулаган.
“Бу борада халқимизда ортиқча хавотир ёки безовталик бўлмаслиги керак. Валюта бозорида кескин тебранишларнинг олдини олиш учун захирамиз етарли”, деган Ш. Мирзиёев.
Президент фикрича, “айниқса кириб келаётган Рамазон ойида нархларнинг барқарорлигини таъминлаш учун тадбиркорларга амалий ёрдам кўрсатиб, нахрларни арзонлаштириш бу улуғ айём кунларида катта савоб эканлигини барча тадбиркорларга тушунтиришлари керак”.
Йиғилишда Россия қўшинларининг Украинага бостириб кириши ортидан бу мамлакатлар билан ишлаётган Ўзбекистондаги корхоналар дуч келаётган муаммоларга ҳам тўхталинган ва уларга муайян кафолатлар берилган.
Хусусан, видеоселекторда қайд этилишича, жорий йил якунига қадар Россия, Украина ва Беларусь билан ишлаётган корхоналарга дебитор қарздорлиги учун жарима қўлланилмайди, бу мамлакатлар билан ишлаётган экспортчиларнинг банк кредитлари бўйича қарздорлиги узайтирилади, пеня ва жарималар ундирилмайди.