“Мен билмаган эканман, маълум бўлдики, ўз мамлакатининг ватанпарвар фуқароси бўлиш учун Россия хатти-ҳаракатларини танқид қилиш, шовқин-сурон кўтариб, эшикни қарсиллатиб ёпганча чет элга чиқиб кетиш ва сиёсий ҳарорат пасайганидан сўнг ҳеч нима бўлмагандек қайтиб келиш керак экан”, деб ёзган Қодиров “Песковнинг приоритетлари шкаласи” хомлигини писанда қилган.
Аввалроқ Дмитрий Песков журналистларнинг саволларига жавоб бераркан, Россиянинг Украинадаги “махсус ҳарбий амалиёти”ни дастакламаган, шунингдек Россияни тарк этган ҳаммани ҳам хоин ва “бешинчи колонна” деб атаб бўлмаслигини айтган эди.
“Телебошловчи Иван Ургант – чинакам ватанпарвар, уни яхши биламан. Ўз нуқтаи назари бўлиши мумкин, лекин у ватанпарвар”, деган эди Россия президентининг матбуот котиби Д. Песков.
Айни пайтда, Песковнинг фикрича, урушга қарши чиқаётганлар орасида “давлат душманлари” ҳам бор. “Ҳукуматни сўкаётганлар, қаҳрамон ҳарбийларимизга тош отаётганлар – мана шулар давлат душманларидир, биз уларга қарши кураш олиб борамиз”, деган Песков.
Иван Ургант 24 февралда оиласини олиб Россиядан Исроилга кетган. Мамлакатни тарк этишидан олдин у “Инстаграм”даги саҳифасида “Даҳшат ва изтироб. Уруш бўлмасин”, деган ёзув қолдирган. Унинг “Вечерний Ургант” теледастури эфирга чиқиши тўхтаб қолган, аммо Биринчи канал матбуот хизмати шоу ёпилганига оид маълумотни тасдиқлаган эмас. Кейинроқ Иван Ургант таътилга кетгани ва Россияга қайтишини маълум қилган.