Хабарда айтилишича, жумладан, Қорақум туманидаги парникларда етиштирилаётган савбзавотлар ҳажмини кўпайтириш ва Россияга экспорт қилиш масаласи 1 март куни ўтган йиғилишда муҳокама қилинган.
Расмийлар сифатли мева-сабзавотни Россияга экспорт қилиб, сифатсизроқларини ички бозорда сотиш борасида фикр алмашган.
23 март куни ҳам Озодлик радиоси туркман хизмати Мари вилояти расмийлари деҳқонларга Россияга мева-сабзавот, шакар, гўшт ва бошқа маҳсулотларни жўнатишни кўпайтириш режаси борлигини билдиришган.
Ғарб санкциялари ортидан Россияда озиқ-овқат маҳсулотларининг бир қатор турлари тақчиллашди. Бунинг оқибатида Россия қўшни давлатлардан экспорт қилинадиган қишлоқ хўжалик маҳсулотларига жорий этилган айрим фитосанитар нормаларни бекор қилди. Масалан, 5 мартда “Россельхознадзор” Россияга Туркманистондан помидор олиб кирилишига қўйилган чекловни бекор қилган.
Айни пайтда бир неча йилдан бери Туркманистонда озиқ-овқат тақчиллиги кузатилиб келинади. Шаҳарлар аҳолиси давлат дўконларидан арзон нархда озиқ-овқат маҳсулотлари харид қилиш учун ярим кечадан бошлаб навбатларга туриши аввалроқ хабар қилинган.