Украина раҳбари Киевнинг Буча чеккасида содир бўлган воқеалар ҳақида батафсил гапириб берди, у таъкидлаганидек, бутун оилалар «тушунмасдан ўлдирилган», айниқса, у ёки бу даражада Украина ҳукуматига ёрдам берганлар.
«Бучада улар қилмаган бирорта ҳам жиноят қолмади. Улар бутун оилаларни — катталарни ва болаларни ўлдиришди, одамларни ёқишга уринишди. Баъзиларини кўчада отиб ташлашди, баъзиларини уйларда ўлдиришди, машинада бўлганларни танкларда босиб ўтишди, аёлларни зўрлаб, болаларнинг кўз ўнгида ўлдиришди, улар мамлакатни вайронага айлантириб кетишди», — деди Владимир Зеленский.
Бундан ташқари, Зеленский таъкидлаганидек, «тажовузкорлик Африка ва Осиёда очарчиликка олиб келиши мумкин бўлган озиқ-овқат инқирозини, хавфсизлик тизими йўқолиб бораётган мамлакатларда эса сиёсий бетартибликни келтириб чиқарди».
Украина президенти Бучадаги қирғинларни Иккинчи жаҳон урушидан кейинги «энг даҳшатли уруш жиноятлари» деб атади ва унинг сўзларига кўра, бу шаҳар «босқинчилар ўтмишда Украина тупроғида қилган ишларининг кўплаб мисолларидан бири, холос.»
Украина президенти БМТ Хавфсизлик Кенгашини нафақат Москвага қарши санкцияларни зудлик билан кучайтиришга, балки Россияни Хавфсизлик Кенгашидан чиқариб ташлашга чақирди, чунки унинг сўзларига кўра, Россия доимий аъзо сифатида вето ҳуқуқини ўзгартирган.
Украина президенти Владимир Зеленский БМТ Хавфсизлик кенгашини танқид қилди.
Унинг сўзларига кўра, Хавфсизлик кенгашининг фаолияти Россиянинг Украинага қарши уруши фонида самарасиз бўлди.
«Хавфсизлик кенгаши қани? Бутун дунёда тинчлик сақланишига масъул институт самарасиз фаолият кўрсатмоқда. Хавфсизлик кенгаши кафолат бериши керак бўлган ўша хавфсизлик қаерда? У йўқ. Тинчлик учун ташкил этилган БМТ қани? У йўқ», деди Украина президенти.
Зеленский Хавфсизлик кенгашини зудлик билан ички ислоҳотлар ўтказишга чақирди. Унинг айтишича, мазкур орган ўз олдига қўйган асосий мақсадларни амалга оширишга қодир бўлмагани учун ислоҳотлар зарур.
«БМТни ёпишга тайёрмисиз? Халқаро ҳуқуқ даври тугадими? Агар йўқ деб ҳисобласангиз, у ҳолда дарҳол ҳаракатга келишингиз зарур. БМТ низомини зудлик билан тиклаш керак, БМТ тизимини ислоҳ қилиш керак», – деди Зеленский.
Россиянинг халқаро ташкилотдаги доимий вакили Василий Небензя сешанба куни БМТ Хавфсизлик Кенгашининг Украинадаги гуманитар вазият бўйича йиғилишида сўзга чиқиб, Россия Украинадаги «тинч аҳолини қутқариш учун тинч аҳоли нишонларига зарба бермаяпти», деб таъкидлади.
Яқинда Россия қўшинлари ташлаб кетган Буча шаҳрида ўнлаб тинч аҳоли, жумладан, қўллари боғланган ҳолда ҳалок бўлган жасадлар топилди. Бундан ташқари, шаҳарда оммавий қабрлар борлиги хабар қилинган. Украина расмийлари томонидан айтилишича, жабрланганларнинг умумий сони 300 дан ошади. Айтилишича, булар россиялик ҳарбийлар қурбонларидир.
Россия Бучада тинч аҳолини ўлдириш ҳақидаги айбловларни қатъиян рад этади. Василий Небензя яқинда Нью-Йоркда Киев чеккасидаги воқеалар россиялик ҳарбийларни обрўсизлантириш ва инсонийликдан маҳрум этишга қаратилган навбатдаги тайёрланган провокация эканлигини айтди. Небензнянинг сўзларига кўра, Москва Россия армиясининг ваҳшийликларга алоқаси йўқлигини тасдиқловчи ҳақиқий далилларга эга.
Дунёнинг 40 дан ортиқ давлати Украинада «махсус операция» бошланганидан бери Россия ва Россия қўшинлари содир этиши мумкин бўлган ҳарбий жиноятлар ва инсониятга қарши жиноятларни биргаликда тергов қилмоқда. Мустақил терговни Гаагадаги Халқаро жиноят суди ҳам олиб бормоқда.