Орбаннинг айтишича, музокараларда Украина президенти Владимир Зеленский ҳамда Германия ва Франция раҳбарлари ҳам иштирок этиши лозим. Венгрия бош вазирининг сўзларига кўра, Путин бунга «ижобий» муносабат билдирган, бироқ бир қатор шартларни илгари сурган. У қандай шартлар борлигини айтмади.
Орбаннинг айтишича, у Путинни Украинада зудлик билан ўт очишни тўхтатишга чақирган. У Россиянинг Украинадаги ҳаракатларини агрессия деб атаган, бироқ Венгрия НАТОнинг кўплаб давлатларидан фарқли ўлароқ, Киевга қурол етказиб бермаслигини яна бир бор таъкидлади. У, шунингдек, Будапешт Кремль талабини бажаришга ва Россия гази учун рублда тўлашга тайёрлигини айтди.
Украина президенти девонининг маслаҳатчиси Михайло Подоляк Орбаннинг баёнотларини изоҳлар экан, Киев уларни жиддий кўриб чиқмаслигини аниқ айтди. Россия-Украина музокаралари онлайн давом этмоқда, бироқ лидерларнинг Будапештдаги эҳтимолий учрашуви муҳокама қилинмаяпти.
Яқинда парламент сайловларида Орбан партияси ғалаба қозонди. Ғалабадан сўнг Орбан ўз рақиблари қаторида Украина президенти Владимир Зеленскийни ҳам Кремлга нисбатан юмшоқ муносабатда бўлганликда айблади. Орбан ва Европа Иттифоқининг кўплаб сиёсатчилари амалда Путин тарафдори позициясида айбланмоқда. Будапештнинг таъкидлашича, улар бошқа Европа Иттифоқи давлатлари томонидан қўллаб-қувватланган Россияга қарши санкцияларни тўсиб қўймаяпти, балки ўз манфаатларини ҳимоя қилишга интилмоқда. Жумладан, Венгрия Россиядан газ етказиб бериш эмбаргосига кескин қарши.
Россия қўшинлари Киевдан олиб чиқиб кетилгандан сўнг, Украинадаги жанговар ҳаракатларнинг оғирлик маркази энди шарққа, биринчи навбатда, Донбассга кўчди.
Шу билан бирга, мудофаа вазирлигининг юқори мартабали мулозимининг CNN телеканалига айтишича, Путиннинг узоқ муддатли мақсадлари нимадан иборатлиги ҳалигача номаълум. АҚШ ва унинг иттифоқчилари Путин Донбассдаги топшириқларини бажариб бўлгач, Киев ҳудудига қайта бостириб киришга уриниб кўриши эҳтимолидан тайёрланмоқда. АҚШ, Европа ва Украина расмийлари CNN телеканалига Россия Украина билан яхши ният билан музокара олиб бораётганига ишонмасликларини ва музокаралар «сароб экрани»дан бошқа нарса эмаслигини айтишди.
Украина бош вазири ўринбосари Ирина Верешчук чоршанба куни Украина назоратидаги Донеск ва Луганск вилоятлари ҳамда Харков вилоятининг бир қисми аҳолисини эвакуация қилишга чақирди.