Бу ҳақда Британиянинг The Telegraph газетасига берган интервьюсида НАТО бош котиби Енс Столтенберг айтиб ўтди. Унинг сўзларига кўра, Альянс ҳозирда “фундаментал трансформация» босқичида ва бу жараёнда Россия президенти Владимир Путин томонидан амалга оширилган ҳаракатларнинг узоқ муддатли оқибатлари ҳисобга олинган.
«Биз ҳозир кўраётган нарса — бу янги воқелик, Европа хавфсизлиги учун янги норма. Шунинг учун биз ҳарбий раҳбарларимиздан НАТОни қайта тиклаш ва узоқ муддатли мослашиш деб атайдиган вариантларни тақдим этишларини сўраймиз», — дейди Столтенберг.
Яқинда ўз ваколатларини яна бир йилга узайтиришини эълон қилган Енс Столтенберг The Telegraph нашри шарҳларида қайта тиклаш бўйича барча қарорлар жорий йилнинг июнь ойида Мадридда бўлиб ўтадиган НАТО саммитида қабул қилинишини таъкидлади.
Аввалроқ Столтенберг Альянснинг шарқий қанотини мустаҳкамлаш зарурлигини бир неча бор таъкидлаган эди.
Россиянинг 24 февралда бошланган Украинага ҳарбий бостириб кириши Европада Иккинчи жаҳон урушидан буён энг йирик қочқинлар инқирозини келтириб чиқарди ва Ғарб етакчиларини агрессияга қарши мудофаа сиёсатини қайта кўриб чиқишга ундади.