Кремль матбуот котиби Дмитрий Песков журналистларга берган интервьюсида «Москва албатта Путиннинг қизларига қарши жорий этилган санкцияларга жавоб қайтаради», деб билдирди.
Россия президенти бундан аввал эндокринолог Мария Воронцова ва илмий менежер Катерина Тихонова ўзининг қизлари эканини тасдиқламаган, аммо инкор ҳам қилмаган эди.
6 апрелда Қўшма Штатлар Россиянинг Сбербанки, Альфа-банки, қатор юқори лавозимли амалдорлар, уларнинг оила аъзолари, жумладан, Путиннинг қизларига нисбатан санкцияларни жорий этганди.
Тиббиёт фанлари номзоди Воронцова (Фаасен ва Путина фамилияларига ҳам эга) 1985 йилнинг 28 апрелида Ленинград шаҳрида туғилган. "Иннопрактика" фонди асосчиси ва раиси Тихонова (Шамалова ва Путина фамилияларига ҳам эга), 1986 йилнинг 31 августида Германиянинг Дрезден шаҳрида туғилган.
Bloomberg нашрининг ёзишича, Путин қизларига жорий этилган санкциялар рамзий характерга эга. Чунки уларнинг Россия ташқарисида мол-мулклари борлиги тўғрисида ҳеч қандай маълумот мавжуд эмас.