«Украинага бостириб киришнинг дастлабки кунлариданоқ Нокиа учун Россияда фаолиятини давом эттириш имконсизлиги аён бўлди. Сўнгги ҳафталарда биз товар етказиб беришни, янги бизнесни тўхтатдик ва чекланган илмий-тадқиқот ишларини Россиядан ташқарига кўчирдик. Биз Россия бозоридан чиқишимизни эълон қиламиз», дейилади компания баёнотида.
Шу билан бирга, Нокиа Россияда телекоммуникация тармоқларининг ишлашини сақлаб қолишда давом этиш ниятида ва санкциялар бўйича ушбу ёрдамни кўрсатиш учун зарур бўлган лицензиялар учун ариза топширади.
Бир кун аввал Нокиа ва Хитойнинг Huawei компаниялари билан биргаликда телекоммуникация ускуналарини етказиб берувчи учта глобал таъминотчидан бири бўлган Швециянинг Ericsson компанияси Россиядаги ишини тўхтатиб, россиялик ходимларни ишсиз қолдирган эди. Компания сайтидаги хабарда бу сўнгги воқеалар ва Россиянинг Украинага бостириб киришига жавобан ЕИнинг Москвага қарши санкциялари билан изоҳланган.
8 апрель куни киритилган бешинчи санкция пакети 50 фоиздан ортиқ давлат назорати остидаги операторларга фуқаролик алоқа тармоқлари учун ускуналарни Россияга етказиб беришни тақиқлади.