Ссылки доступа

Ереванда арман мухолифатининг норозилик намойиши бўлиб ўтмоқда


Арманистон пойтахти Ереванда 26 апрелдан буён мухолифатнинг норозилик акциялари ўтказилмоқда. “Қаршилик” ҳаракати Пашинян ҳукуматини Боку билан Тоғли Қорабоғнинг бутун ҳудуди устидан Озарбайжон суверенитети тан олинган шартномани имзоламоқчи бўлаётганликда айблаяпти.

Мухолифатчиларга кўра, воқеаларнинг бу тахлит ривожини жамоатчилик босими остида Пашинянни истеъфога чиқариш йўли билан тўхтатиш мумкин.

Бундан ташқари, намойишчиларнинг бир қисми 26 апрель куни Пашинян кортежидан бўлган автомобиль уриб юборгани ортидан вафот этган ҳомиладор аёлнинг ўлими юзасидан норозилик изҳор қилиб чиққан.

Чоршанба куни расмийлар фожиа юз берган пайтда бош вазир кортеждаги машиналардан бири бўлганини тан олишган. Пашинян девонхонаси иддаосича, бош вазир “йиқилган аёл”ни машина ойнасидан кўриб, “тез ёрдам” чақиришга буйруқ берган, бироқ унинг ўз кортежига оид автомобиль уриб юборганини билган эмас. “Уриб юборилган аёлга ёрдам бериш учун кортеж нега тўхтагани йўқ?” деган саволга Пашинян девонхонаси раҳбарининг муовини: “Бу тиқилинчни юзага келтирган бўларди ва “тез ёрдам” у ёққа ўтолмай қоларди”, дея жавоб берган.

Ҳодисадан кейин аёлнинг ҳам, қорнидаги боласининг ҳам ҳаётини сақлаб қолишнинг имкони бўлмаган. Хабар қилинишича, фожиадан хабар топган Пашинян вафот этган 28 ёшли Сона Мнацаканяннинг отаси билан гаплашиб, унга таъзия изҳор қилган ҳамда ҳодиса юзасидан холис тергов ўтказилишига ишонтирган.

Озодликнинг арман хизмати хабарига кўра, Ереванда бўлиб ўтган акциялар чоғида безориликда айбланиб сешанба куни 3 киши, чоршанба куни эса 20 киши қўлга олинган.

XS
SM
MD
LG