Ссылки доступа

Чегарадаги можарода ҳалок бўлган тез ёрдам ҳайдовчисининг оиласи: расмийлар ваъдаларида турмади (видео)


Абдулатиф Шарифов

Қирғизистон билан чегарадаги можаро оқибатида уч ой олдин ҳалок бўлган тез тиббий ёрдам машинаси ҳайдовчиси Абдулатиф Шарифовнинг яқинлари расмийлар берган ваъдаларида турмаганидан шикоят қилмоқда.

Уларнинг сўзларига кўра, Шарифовнинг 60 ойлик маошини тўлаб бериш, фарзандларига ер ажратиш ва кўчага унинг номини бериш ваъда қилинган, бироқ юқоридагиларнинг ҳеч бири бажарилмаган. Айни пайтда Исфара марказий шифохонаси раҳбарияти ваъдалар унутилмаганини таъкидлади.

Абдулатиф Шарифовнинг беваси ҳар куни эрини эслайди. Иноятхон Шарифованинг айтишича, турмуш ўртоғи ўн йил тез тиббий ёрдам ҳайдовчиси бўлиб ишлаган ва ўз ишини яхши кўрган. «У кучли одам эди. У бутун умрини касалхонада ўтказди. У ҳар доим биринчи қўнғироқда ёрдамга келган», — дейди у.

Абдулатиф Шарифов 27 январь куни Хўжай Ало қишлоғи аҳолисини қирғиз томонининг миномётдан ўққа тутиши чоғида қутқарув ишларида ҳалок бўлган. Бунгача у бир қанча ярадорларни касалхонага етказишга муваффақ бўлган.

Қайд этилишича, Абдулатиф Шарифов ва яна икки киши бўлган тез ёрдам машинаси миномётдан отилган. Ҳайдовчи воқеа жойида вафот этди, икки киши жароҳат олди. Шарифов худди шу куни дафн этилган. Яқинларининг айтишича, Исфара шифохонаси бош шифокори марҳумнинг оиласини дафн маросимида қўллаб-қувватлашга ваъда берган.

Абдулатиф Шарифовнинг қариндоши Таборахоннинг айтишича, бош шифокор марҳумнинг оиласига ер ажратиб беришни ваъда қилган. «У 60 ойлик маошини ҳам бериб, хотирасига кўча номини беришга ваъда берди. Лекин ҳеч нарса қилинмади», — деди у.

Исфара марказий шифохонаси бош шифокори Тоиббидин Муҳаммедов хизмат сафарида экани ҳақида хабар берди. Бошқа шифохона ходимлари ваъдаларини унутмаганликларига ишонтиришди.

Хусусан, ҳужжатлардан бирида шифохона бош врачи Исфара шаҳар ҳокимидан Абдулатиф Шарифовнинг фарзандлари учун ер ажратиб беришни сўраган. Шарифов 2017 йилдан буён ер олиш учун навбатда тургани хабар қилинган.

Яна бир ҳужжатда бош шифокор Исфара халқ депутатларига кўчалардан бирига Шарифов номини беришни таклиф қилган. Касалхона ходимлари микрофонсиз суҳбатда Абдулатиф Шарифовнинг 60 ойлик маоши бўлиб-бўлиб тўланишини айтди. Шунингдек, Абдулатиф Шарифовнинг оиласига бир неча бор моддий ёрдам кўрсатилганини ҳам айтишган.

XS
SM
MD
LG