Бу ҳақда New York Times исмлари сир бўлиб қолишини хоҳлаган Пентагон вакилларидан олинган маълумотга таянган ҳолда хабар қилди.
Россия учувчилари одатда ердаги нишонларни тезда аниқлаб, уларга қарата ракета йўллай олишмайди. Қисман шу туфайли Россия Украинанинг ҳаво ҳужумидан мудофаа тизимларини яксон қила олмаган ва ўз авиациясининг мутлақ устунлигига эришолмаган. Украина ҳудудига ташқаридан йўлланаётган ракеталар кўпинча мўлжалга тегмаяпти ёки портламаяпти.
Россия бунақа қурол-аслаҳа устида сўнгги 20 йилдагина жиддий иш олиб борган, яъни Қўшма Штатлардан камида 20 йилга ортда қолган. Суриядаги урушда Россия ўзи мўлжалга олувчи қуролларни муваффақиятли қўллаган, бироқ бунақа ҳолатлар жуда кам, устига устак, Сурияда русларга хавф соладиган ҳаво ҳужумига қарши воситалар ва қирувчи учоқлар бўлган эмас.
Россия Украинада бошқариладиган Х-101 қанотли ракеталари, “Искандер” ва “Точка” баллистик ракеталари, шунингдек кемалардан учириладиган “Калибр” қанотли ракеталарини қўлламоқда. Америкалик таҳлилчиларга кўра, россиялик мутахассислар қанотли ракеталар йўналиши ва бошқа парвоз параметрларини аниқ белгилаб берадиган сифатли дастур-йўриқномалар яратишга лаёқатли эмаслиги маълум бўлган. “Украинадаги уруш Россиянинг бунақа қуроллари ҳали “жуда хом”лиги кўрсатди”, деган New York Times суҳбатдошлари.