Фармонга кўра, Украинадаги “махсус амалиёт”да иштирок этган ёки этаётган ҳарбий хизматчилар ва давлат идоралари ходимларининг фарзандлари ОТМларга киришда махсус квота олади, уларга барча бюджет ўринларининг 10 фоизини ажратиш режаланмоқда.
Украинада ҳалок бўлган ёки яраланган ҳарбийларнинг фарзандлари ОТМларга кириш имтиҳонларисиз қабул қилинади.
Путин бу ҳақда Москванинг Қизил майдонида бўлиб ўтган парад чоғида эълон қилган. У “ҳалок бўлганлар ва ярадорларнинг фарзандлари алоҳида тартибда қўллаб-қувватланади”, деб айтган.
Март ойи бошларида Путин Украинада ўлган ҳар бир ҳарбий хизматчининг оиласи қонунда назарда тутилган суғурта таъминоти ва 7,4 миллион рубль миқдорида бир марталик нафақа олишига ваъда берган эди. Бундан ташқари, у ҳар бир ўлган ҳарбийнинг оиласига қўшимча 5 миллион рублдан ажратилишини маълум қилган.
Ярадор бўлганларга суғурта тўлови ҳамда бир марталик нафақа тўлашга кўрсатма берилган. Ҳарбий хизматга яроқсиз бўлиб қолган ҳарбийнинг оиласига 2,9 миллион рубль миқдорида бир марталик нафақа ҳамда 3 миллион рубль қўшимча нафақа тўлаш белгиланган. Ҳарбий хизматчи ногирон бўлиб қолган тақдирда эса унга ойма-ой компенсация тўланиши керак.