Экономикасы дамыған елдер тобы - "Үлкен жетілік" Қытайды Украина егемендігін қолдауға, Ресейге көмектеспеуге шақырды. Бұған қоса, топ Мәскеудің Киевке қарсы себепсіз соғыс ашуы бүкіл әлемге қауіп төндіріп, азық-түлік және энергетика дағдарысын тудыратынын ескертті.
"Үлкен жетілік" Ресейдің одақтасы Беларусь билігін де Мәскеудің әскери қимылдарын "қолдауды" доғаруға, "халықаралық міндеттерін орындауға" шақырды.
G7 тобына АҚШ, Ұлыбритания, Канада, Франция, Германия, Италия және Жапония кіреді. Топ Ресейдің Украинада басып алған астық қоймаларын азат ету керектігін мәлімдеді. Сол себепті Украина астық экспорттай алмай отыр. Мұндай жағдай азық-түлік дағдарысын тереңдетуі мүмкін.
Мәліметтерге қарағанда, Украина 25 миллион тонна астықты шетелге шығара алмай отыр. Соның салдарынан Таяу Шығыс және Африка елдері нансыз қалуы мүмкін.