Ссылки доступа

Қозоғистон ҳукумати нефть экспорти «тўлиқ тиклангани»ни эълон қилди


Каспий қувурлари консорциумида (КҚК) ўтказувчанлик чекловлари бекор қилинди, Қозоғистон юк жўнатувчилардан нефтни қабул қилиш тўлиқ тикланди.

Бу ҳақда Қозоғистон бош вазири Алихан Смаилов КҚК бош директори Николай Горбан билан Қозоғистон нефти экспорти масалаларига бағишланган учрашув якунлари бўйича маълум қилди.

Қозоғистон бош вазири сайтида эълон қилинган хабарда айтилишича, барча масофавий боғловчи қурилмалар ишламоқда.

«Биз КҚК терминалидаги шикастланган денгиз блокларининг таъмирлаш ишлари тугаганидан хурсандмиз. Бу чекловларни олиб ташлаш ва Қозоғистонда нефть қазиб олишни тўлиқ тиклаш имконини берди», — деди Алихон Смаилов.

Аввалроқ Қозоғистон Энергетика вазирлиги апрель ойи охирида КҚКга асосий нефть экспорти йўналиши тўлиқ тикланишини кутаётганини маълум қилганди.

КҚК нефть қувури Қозоғистоннинг йирик Тенгиз, Карачаганак ва Қашаган конларидан нефтни экспорт қилишнинг асосий йўналишини таъминлайди. Қозоғистон ҳукумати маълумотларига кўра, 2021 йилда у орқали 53,1 миллион тонна, жорий йилнинг январь-апрелида 18,7 миллион тонна қозоқ нефти ташилган.

Жорий йилнинг март ойида Новороссийск яқинидаги портда иккита КҚК боғловчи қурилмаси ишдан чиқди. КҚК линияси орқали ташиладиган нефтнинг қарийб 90 фоизи Қозоғистондан келади, Тенгиз, Қашаган ва Карачаганак нефть лойиҳалари деярли барча ҳажмларни таъминлайди. Қувур орқали Россия конларида ишлаб чиқарилган нефтнинг бир қисми ҳам ташилади.

XS
SM
MD
LG