Ссылки доступа

Ба модари президенти Туркманистон унвони "қолинбофи хизматнишондода" доданд


Огулгерек Бердимуҳаммадова, модари президенти Туркманистон Сардор Бердимуҳаммадов соҳиби унвони фахрии "Қолинбофи хизматнишондодаи Туркманистон" шуд.

Фармони эътои ин унвон дар нашрияи давлатии "Туркманистони бетараф" нашр шуд.

Унвони мазкурро ба модари президент барои хизматҳояш "дар тақвияти истиқолол ва ягонагии Туркманистон, рушди санъати миллии қолинбофӣ, нақшбании қолинҳо ва заҳмати тӯлонии чандинсола, санъати касбӣ" додаанд.

Чунин унвон дар баробари модари президент ба 11 зани дигар дода шудааст.

Унвони "Қолинбофи хизматнишондодаи Туркманистон" ҳамасола дар остонаи рӯзи қолинҳои туркманӣ дода мешавад, ки якшанбеи охири моҳи май таҷлил мегардад. Ин ҷанш соли 1999 ҷорӣ шуд.

Шаҳрвандони Туркманистон то кунун дар бораи модари президенти кунунӣ ва ҳамсари президенти пешини он кишвар иттилои зиёде надоранд. Маълум нест, Огулгерек Бердимуҳаммадова чанд сол дорад ва ба чӣ кор машғул буду ҳаст. Қурбонқулӣ Бердимуҳаммадов, президенти пешини Туркманистон дар сафарҳои хориҷӣ ҳамсарашро бо худ намебурд. Расонаҳои Туркманистон танҳо соли гузашта акси ҳамсари президенти пешинро нашр карданд.

Сардор Бердимуҳаммадов дар моҳи марти соли ҷорӣ сари қудрат омад. Вай дар ин мақом падарш Қурбонқулӣ Бердимуҳаммадовро иваз кард.

XS
SM
MD
LG