Йиғилганлар «Бўстандиқ!» («Озодлик!») деб ҳайқирди. Улар яқинларининг портретлари ва «Бизнинг эрларимиз, ака-укаларимиз ва болаларимиз террорчи эмас», «Биз халқаро терговни талаб қиламиз!», дея ёзув туширилган плакатлар билан чиқишди. Иштирокчилар расмийларни ўз яқинларига қўйилган айбловларни олиб ташлашга чақирди.
Журналист Данияр Молдабеков Инстаграмда жойлаган видеода воқеа жойига етиб келган ҳокимлик вакили «ҳеч қандай хабарнома бўлмагани» ва бу ҳаракат «ноқонуний» эканини айтган. Ҳокимлик вакилининг сўзлари йиғилганларнинг норозилигига сабаб бўлди. «Биринчи навбатда, одамлар бу ерга нима учун келганини сўранг», деди бир неча намойишчилар жавобан.
Январь воқеалари чоғида маҳбусларга нисбатан қийноқлар қурбони бўлганлардан бири, олмаоталик сураткаш Саят Адилбекули 1 июнь куни Озодлик билан суҳбатда режалаштирилган намойиш куни қурбонлар оммавий равишда коррупцияга қарши кураш хизматига чақирилганини айтди. Коррупцияга қарши кураш хизматидан изоҳ олишга уринишлар муваффақиятсиз тугади.
Бугун Олмаота прокуратураси яқинида идоралараро тергов-тезкор гуруҳи вакиллари билан учрашишни талаб қилиш учун 50-60 га яқин одам, асосан ҳибсда қийноққа солинганини айтганлар ва январь воқеалари бўйича айбланаётганларнинг қариндошлари йиғилишни режалаштирган.
Адилбекули прокуратурага келганида уни ҳибсга олишга уринганликларини, бироқ унинг сўзларига кўра, журналистлар воқеа жойида бўлгани учун улар қўйиб юборилганини айтди.
Чоршанба куни тушга яқин йиғилган 15 га яқин одам прокуратура биносига кириб келган, бироқ ходимлар ОАВ вакилларини ичкарига киритмаган. Прокуратура матбуот баёноти кейинроқ берилишини айтди.
Бугун эрталаб полиция январь ойида ҳибсга олинганидан кейин қийноқлардан омон қолган бир неча кишини ҳибсга олгани хабар қилинган эди. Аввалроқ, чоршанба куни улар прокуратура олдида очлик эълон қилишлари ҳақида хабарлар тарқалган эди. Полиция томонидан қўлга олингани айтилаётган одамларнинг телефонлари кун давомида ўчирилган.
Инсон ҳуқуқлари гуруҳлари январь воқеалари бўйича терговларда холислик йўқлиги ҳақида бир неча бор таъкидлаган.
Камида 238 кишининг ҳаётига зомин бўлган (расмий маълумотларга кўра) январь воқеаларидан сўнг ҳуқуқ-тартибот идораларининг ноқонуний тергов ва қийноқлар билан боғлиқ ҳаракатлари устидан бир неча юзлаб шикоятлар келиб тушган. Расмий маълумотларга кўра, ҳалок бўлган 238 кишидан камида саккиз нафари ҳибсда вафот этган.
Январь воқеалари пайтида минглаб одамлар ҳибсга олинди, юзлаб одамлар терроризм, тартибсизликлар, қурол ўғирлаш ва бошқа жиноятларда гумон қилиниб ҳибсга олинди. Кўпгина маҳбуслар полиция томонидан қийноқ ва зўравонлик қурбони бўлганликларини айтишди.
Қозоғистонда январь воқеаларидан кейин икки юздан ортиқ маҳбусларга нисбатан қийноқлар қўзғатилган. Расмийлар ўнга яқин гумондорни ҳибсга олганликларини айтишди.