Ссылки доступа

Чегарадаги отишмада яраланган қирғиз аскари ҳамон реанимацияда қолмоқда


Қирғизистон ва Тожикистон чегарасида 3 июнь куни содир бўлган отишмада жароҳатланган икки ҳарбий хизматчидан бири жарроҳлик амалиётидан сўнг ҳамон реанимацияда қолмоқда.

Бу ҳақда Соғлиқни сақлаш вазирлиги матбуот хизмати хабар берди.

Ярадорлар кейинги даволаниш учун 4 июнь куни Бишкекка олиб кетилиб, Миллий госпиталга ётқизилган.

2001 йилда туғилган сержант Б.Суюнбек ўғлига ёпиқ бош мия жароҳати, бош мия чайқалиши, бел умуртқасининг синиши ташхиси қўйилган. Унинг аҳволи барқарор оғир.

2000 йилда туғилган капрал З.Жалиловнинг бош суяги, бўйин, кўкрак, чап елка ва чап елка суяги жароҳати ташхиси қўйилган. Унинг аҳволи оғир деб баҳоланмоқда.

3 июнь куни Тожикистоннинг Ворух анклавига чегарадош Боткен вилоятининг Булоқ-Боши ҳудудида яна қурол ишлатиш билан боғлиқ можаро келиб чиқди. Бир неча соат давом этган отишмада икки давлат чегарачилари иштирок этган. Ҳодиса оқибатида Қирғизистон Республикаси Чегара хизмати маълумотларига кўра, икки қирғизистонлик ҳарбий жароҳатланган.

Тожикистон расмийлари чегарадаги можарога ҳозирча изоҳ бермаган.

3 июнь куни кечқурун Қирғизистон Чегара хизматининг хабар беришича, томонлар доимий жойлаштириш пунктларига қўшимча куч ва воситаларни олиб чиқишга келишиб олган. Томонлар, шунингдек, чегара патрулларини алмаштириш, муҳандислик иншоотларини демонтаж қилиш мажбуриятини олади.

Қирғизистон ва Тожикистон ўртасидаги чегаранинг узунлиги 970 километр бўлиб, шундан 519 километри аниқланган. Қирғизистоннинг Боткен вилояти ва Тожикистоннинг Сўғд вилояти ўртасидаги участкалар мунозаралилигича қолмоқда.

XS
SM
MD
LG