Ссылки доступа

Қирғизистонда Қамбарота ГЭС-1 қурилиши 8 июнда бошланади


Бу ҳақда 7 июнь куни «Миграция ва тараққиёт: истиқболлар ва янги имкониятлар» форумидан сўнг журналистлар саволларига жавоб берар экан, Вазирлар Маҳкамаси раиси Оқилбек Жапаров маълум қилди.

Унинг сўзларига кўра, ГЭС қурилишининг биринчи босқичи 3,5-5 йил давом этади.

«Эртага қурилиш ишларини бошлаймиз, кўприк қуришимиз, туннелни охиригача ёриб ўтишимиз керак. Буларнинг барчасини ўзимиз бошлаймиз. Бизда 18,8 миллион доллар бор. Биринчи босқич 3,5 йилдан 5 йилгача давом этади. Бу лойиҳага қўшниларимиз ҳам қизиқиш билдирмоқда, бироқ ҳозирча биз инвесторларни кутмай, ўзимиздан бошлаяпмиз», — деди Жапаров.

Оқилбек Жапаров 1 июнь куни Жалолобод вилоятидаги Қамбарота ГЭС-1 қурилиши кутилаётган ҳудудга ташриф буюрди. Сўнгра Энергетика вазири Дўсқул Бекмурзаев икки йил ичида йўллар, кўприклар, бинолар таъмирланиб, янгидан барпо этилишини, ишчилар учун зарур инфратузилма яратилишини айтди. Унга кўра, биринчи ГЭСни 8 йилдан кейин ишга тушириш режалаштирилган.

2021 йил март ойида Қирғизистон ва Ўзбекистон Қамбарота ГЭС-1 лойиҳасини биргаликда ишлаб чиқишга қарор қилгани, шу йилнинг май ойида эса Қозоғистон президенти Қасим-Жўмарт Тўқаев ҳамкорликда қурилишга қизиқиш билдиргани хабар қилинган эди.

2012 йилда Қирғизистон ва Россия ҳукуматлари Қамбарота-1 ва тўртта ГЭСдан иборат Юқори Норин каскадини қуриш бўйича келишув имзолаган эди. Аммо бошланган иш тўхтаб қолгани боис 2016 йилда Қирғизистон келишувни бир томонлама денонсация қилган.

Қамбарота-1 лойиҳасининг сўнгги техник-иқтисодий асоси Канаданинг СНС – Лавалин Интернэшнл Инк.» корпорацияси консорциуми томонидан ишлаб чиқилган. Унга кўра, лойиҳа учун камида 2 миллиард 900 миллион доллар керак бўлган, бироқ харажатлар 3-4 миллиард долларга етиши мумкин. Станция қуввати 1864 мегаватт эканлиги эълон қилинди, бу эса 1200 мегаватт қувватда ишлайдиган Тўқтўғул ГЭС қувватидан кўпроқдир.

XS
SM
MD
LG