Озодликнинг беларус хизмати хабарига кўра, Кузнечик иши бўйича маҳкама мажлиси 8 июнь куни ёпиқ тартибда ўтган. Журналист биринчи марта ўтган йилнинг 25 ноябрида Минскда қўлга олинган эди. Шундан сўнг суд уни икки марта майда безориликка оид модда бўйича ҳибсга олиш ҳақида қарор чиқарган, шу билан у ҳибсхонада қолиб кетаверган. Кузнечик ҳибсхонада бўлган пайтда унга қарши экстремизмда айблов билан жиноят иши қўзғатилган, унга мазкур айблов қўйилгани ҳақида фақат май ойи охирига келиб маълум бўлган.
Беларус расмийлари 2020 йилдаги президент сайловидан кейинги норозилик акциялари ортидан журналистлар, фуқаролик жамияти ва мухолифат вакилларини мисли кўрилмаган даражада таъқиб қила бошлаган. Мазкур акцияларга Александр Лукашенконинг олтинчи марта сайлов ғолиби деб эълон қилиниши сабаб бўлган. Шундан сўнг Беларусда норозиларга қарши минглаб жиноят ишлари очилган, ўн минглаб одам мамлакатни тарк этишга мажбур бўлган, барча мустақил нашрлар таҳририятлари пароканда қилинган.
Озодликнинг беларус хизмати Минск расмийлари томонидан экстремистик ҳамжамият деб эълон қилинган. Бироқ бу, таҳририят қайдича, Кузнечик ҳибсга олинганидан кейин содир бўлган.
Декабрь ойида Озод Европа/Озодлик радиоси (RFE/RL) медиакорпорацияси президенти Жейми Флай Андрей Кузнечикни озод қилиш чақириғи билан чиқиб, “Андрейнинг зудлик билан оиласи бағрига қайтиришга имкон яратилиши лозим, журналистика жиноят эмас”, деган эди.
Могилёв вилояти суди Озодлик радиоси беларус хизмати билан ҳамкорлик қилган журналист Андрей Кузнечик экстремистик ташкилот тузганликда айблаб, 6 йилга озодликдан маҳрум қилди.