Қазақстандағы қант бағасы сауда желілері мен әлеуметтік-азық-түлік корпорациялары арасындағы арнайы келісім көмегімен бақыланады. Жергілікті әкімшіліктермен тиісті келісімі бар рейтерлердің бағаны көтеруге құқығы жоқ - олардағы қант бірден таусылып қалып жатыр. Кондитер өнімдерін шығаратын ірі кәсіпорын Шымкенттегі фабрикасының жұмысын уақытша тоқтатуға мәжбүр болды. Ресей қант экспортына тыйым салған уақытта Қазақстанда осы тауардың тапшы екені бірден білінді. Көрші ел шектеу енгізгелі бері Қазақстанда қант 90 пайызға қымбаттады.
Маусым айының басында премьер-министрдің орынбасары — сауда және интеграция министрі Бақыт Сұлтанов елде қант тапшы екенін мойындап, бқны Ресейдің қант экспортына салған тыйымымен түсіндірді.
Кейін сауда министрлігінің комитеті елде қант тапшылығы жоқ деп мәлімдеді: үш зауыт толық жұмыс істеп тұр, 60 мың тонна қант қоры бар.
10 маусымда кондитерлік өнімдер шығаратын "Лотте Рахат" компаниясы Шымкент қаласындағы фабрикасының жұмысын қант тапшылығына байланысты тоқтатқанын хабарлады. Фабриканың басқарма төрағасы Константин Федорецтің айтуынша, Ресей наурыз айында Еуразия экономикалық одағы елдеріне жаздың аяғына дейін қант шығаруға тыйым салған соң елде қант тапшы бола бастады. Сол себепті компания қант көп қажет ететін кондитерлік өнім түрлерінен уақытша бас тартқан.
— Қант тапшылығына байланысты Шымкенттегі фабрика тоқтап тұр. Әзірге біз оны шілденің аяғына дейін жаптық. Шілдеде қант келсе, жұмысты қайта жалғастырамыз, — дейді Константин Федорец.
Қазақстан 23 мамырда елден шетелге қант алып шығуға жарты жылға тыйым салды. Жергілікті БАҚ елдің Ресей экспортына тәуелді аймақтарында қант тапшы екенін жазды.
Орталық Азияның басқа да елдерінде, әсіресе Тәжікстан мен Өзбекстанда да қант қымбаттады.