Ссылки доступа

Дар робита ба бетартибиҳо дар Қароқалпоқистон парвандаи ҷиноӣ боз шуд


Додситонии кулли Узбекистон дар робита ба бетартибиҳои оммавӣ дар шаҳри Нуқуси он кишвар бо банди "Маслиҳат бо мақсади ғасби қудрат ё сарнагун кардани сохти конститутсионии кишвар" парванда боз кардааст, ки аз 10 то 20 соли зиндонро пешбинӣ мекунад.

Аброр Маматов, як масъули Додситонии кулли Узбекистон 4 июл дар нишасти хабарие гуфт, парвандаро гурӯҳи тафтишотӣ, ки ба ҳайати он намояндагони Хадамоти амнияти давлатӣ, Додситонии кул, Вазорати корҳои дохилӣ ва Горди миллӣ шомиланд, тафтиш мекунад.

"Тафтишот ва корҳои оперативӣ-ҷустуҷӯӣ тибқи муқаррароти қонунгузорӣ анҷом шуда, барои таъмини волоияти қонун ва ногузирии ҷазо тамоми чораҳо андешида мешаванд", - афзудааст Маматов.

Бетартибиҳо дар Қароқалпоқистон баъди он баргузор шуд, ки мақомоти Узбекистон рӯзи 26-уми июн тарҳи нави Конститутсияро ба баррасии умум гузоштанд. Бар асоси он, “мустақилӣ”-и Ҷумҳурии мухтор аз байн рафтааст. Дертар ва баъди тазоҳуроти хунин порлумони Узбекистон гуфт, мақоми мухтори Қароқалпоқистон нигоҳ дошта хоҳад шуд.

XS
SM
MD
LG