Журналистларга кўра, товон пули олишга ҳақдорлар тахминан 15-17 минг кишини ташкил қилади. Суриштирувда ҳалок бўлган ҳар бир аскар учун 9,5 миллион, ярадорга эса 4,5 миллион рублгача товон тўланиши кераклигидан келиб чиқилган.
Шу тариқа, Украинада уруш бошланганидан бери 150 минг кишилик “босқинчи армия”нинг қарийб 10-15 фоиз жангчиси ўлган ёки яраланган бўлиши мумкин, дейилган суриштирувда.
Нашрнинг ёзишича, товон пули тўлаш учун маблағлар 10 мартдаёқ захира қилина бошланган. Товон миқдорини Россия президенти Владимир Путин белгилаб берган эди.
Молия вазирлиги Росгвардия учун 1,5 миллиард ва Мудофаа вазирлиги учун 15 миллиард рубль ажратган. Бу сумма урушнинг илк ҳафтасида расман очиқланган талафотлар билан қарийб уйғун. Ўшанда Россия Мудофаа вазирлиги 498 аскар ўлгани ва 1597 аскар яраланганини билдирган. 25 мартдан сўнг вазирлик шахсий таркибдаги йўқотишларга доир маълумотларни эълон қилишни тўхтатган.
Журналистлар Украинада Россиядан нафақат ҳарбий хизматчилар, балки фуқаровий шахслар ҳам ҳалок бўлаётганини урғулашган. Босиб олинган ҳудудларга волонтёрлар, тиббиётчилар, мулозимлар ва ФВВ ходимлари жўнатилмоқда. Уларга яраланган тақдирда 3 миллион ва ҳалок бўлган тақдирда яқинларига 5 миллион рубл товон тўланиши белгиланган. Бунинг учун федерал бюджетдан 300 миллион рубль ажратилган.
Украинада жанг қилаётган аскарларнинг кўплаб яқинлари Россияда товон пули олиш қийинлигини айтишмоқда. Масалан, аскар ўлганлар эмас, бедарак кетганлар рўйхатида бўлса, товон пули олишнинг имкони йўқ. Шунингдек, кўнгиллилар, тан олинмаган “ДХР” ва “ЛХР” ҳарбий тузилмалари аъзолари ва хусусий ҳарбий ширкатларнинг ёлланма аскарлари ҳам Россиядан товон пули олишмайди.
Украинада кенг кўламли уруш бошланганидан бери Россия ҳукумати ҳалок бўлган ёки яраланган ҳарбий хизматчиларнинг оилаларига товон тўлаш учун 113 миллиард рубль маблағ ажратган, шундан 89 миллиард рубли тўлаб бўлинган. Бу ҳақда “Новая газета.Европа” нашри суриштирувида айтилган.