Халқ хунрезлик қурбонларини оқлаши кутилаётган мамлакат президенти билан учрашишни талаб қилди. “Ҳаммамизни олиб кетишди, Сариарқа милиция бўлимига олиб кетишяпти”, деди намойишчилардан бири Бахитжан Шингисбеков.
Унинг сўзларига кўра, ҳокимият уларни овоз кучайтиргич орқали акциянинг ноқонунийлиги ҳақида огоҳлантирган, кейин эса уларни ҳибсга олишга киришган. Шаҳар полиция департаменти Озодликка “ҳибсга олинганлардан хабари йўқлигини”, аммо раҳбариятдан билиб олишларини айтди.
Озодлик мухбири воқеа жойига бориб, бир кун аввал намойишчилар учун Оқўрда йўлини тўсиб қўйган тўсиқни полиция ходимлари қандай демонтаж қилаётганини кўрди. Бугун намойишчилардан бирига тиббий ёрдам зарурлиги маълум бўлди.
Қозоғистоннинг турли вилоятларидан пойтахтга келган январь ойида ҳалок бўлганларнинг яқинлари Оқўрдада уч кечани тунашди. Улар йил бошидаги хунрезлик чоғида ҳалок бўлганларни оқлашни талаб қилишди, чунки ёшлар “ўлимдан кейин, далилсиз айбланган”. Январь ойида ҳалок бўлган тинч намойишчиларнинг аксарияти тергов томонидан «тўполончилар» ёки «террорчилар» деб тан олинган.
13 июль куни президент маъмурияти вакили намойишчиларни бирма-бир қабул қилишини айтди, бироқ гуруҳ “бир хил муаммолар” бўлгани учун умумий йиғилишни талаб қилди. Прокуратура уларга кўриб чиқиш учун 15 кун керак, деб жавоб берди.
5 июнь, Конституцияга ўзгартиришлар киритиш бўйича референдум куни Президент Тўқаев “тинч аҳолига қарши асоссиз ҳаракатларга алоқадор бўлган барча ҳарбийлар табиий равишда жавобгарликка тортилишини” айтди.
Қозоғистонда йил бошида ҳукуматга қарши оммавий намойишларда, расмий маълумотларга кўра, 232 киши ҳалок бўлган, яна олти киши ҳибсдан кейин қийноқлар қурбони бўлган.