Путин Теҳронда Эрон президенти Иброҳим Раисий ва мамлакатнинг Олий руҳоний раҳбари Али Хоманаий ҳамда Туркия президенти Ражаб Тоййиб Эрдўғон билан учрашди.
Путин сафари Суриядаги вазиятга ечим топишга қаратилган Остона форматидаги музокаралар доирасида ташкил этилган. Россия ва Эрон Сурияда авторитар президент Башар Асад бошчилигидаги марказий ҳокимиятни, Туркия эса мамлакат шимолидаги қуролли мухолифатни дастакламоқда. Бироқ музокараларнинг яна бир мавзуси Украинадаги уруш бўлган.
НАТОга аъзо давлат бўлишига қарамай, Туркия Россияга қарши санкцияларга қўшилган эмас, айни пайтда мамлакат Украинага қурол-аслаҳа етказиб бермоқда. Анқара Москва ва Киев ўртасидаги музокараларда воситачилик қилиш таклифи билан чиққан. Туркиядаги музокараларда томонлар, хусусан, Украинанинг уруш туфайли қамалда қолмиш портларидан денгиз йўли билан ғалла олиб чиқишни таъминлаш масаласини муҳокама қилишмоқда.
Теҳрон расмийлари дунёда Россиянинг уруш бўйича позициясини очиқ дастаклаган кам сонли шахслардан бўлиб ҳисобланишади. Ғарб мамлакатлари гумонича, Эрон ҳарбий дронларни етказиб бериш орқали Москвага техник кўмак кўрсатиши мумкин. Теҳрон бу маълумотни рад этиб келмоқда, бироқ Хоманаий Путин билан учрашувдан кейин “агар Россия Украинада уруш бошламаганида эди, урушни НАТО мамлакатлари бошлаган бўларди” қабилидаги Кремль тезисларидан бирини такрорлаган.
Путин сафари олдидан Россиянинг “Газпром” ширкати ва Эроннинг миллий нефть-газ ширкати (NIOС) 40 миллиард долларлик инвестицион лойиҳаларга оид англашув меморандумини имзолашган.
Эрон иқтисодиёти ҳам худди Россияники каби Ғарб санкциялари остида бўлиб, икки мамлакат сиёсатчилари Россия иқтисодиётининг иҳоталаниши манзарасида ўзаро ҳамкорликни кенгайтиришга оид баёнотлар беришган.
Музокаралардан сўнг томонлар террорчиликка қарши биргаликда курашишда давом этишларини билдиришган, бироқ қандай келишувларга эришилганини очиқлашмаган.
Теҳрондаги учрашувда Путин ва Эрдўғон ғалла бўйича музокараларда олға силжиш кузатилаётганини билдиришган.
Россия президенти Владимир Путин 19 июль куни Эронга сафар қилди. Бу унинг Украинадаги уруш бошидан бери узоқ хорижга қилган илк сафаридир.