Ссылки доступа

Ўзбекистонлик қозоқ йигит январь воқеалари бўйича шартли қамоқ жазосига ҳукм қилинди


19 июль куни Олмаота суди январь воқеаларида “оммавий тартибсизликлар” моддаси бўйича айбланган ўзбекистонлик қозоқ йигит Сакен Талиповга нисбатан ҳукм чиқарди.

У бир йиллик шартли жазога ҳукм қилинди. Январь ойидан бери тергов изоляторида сақланаётган Толипов суд залида озодликка чиқарилган.

“Ўғлим у ерга [Алмати Арена ва Республика майдонида] нима бўлаётганини кўришга қизиқиб борган, унинг жиноий ният йўқ эди. Бунинг исботи учун видео бор, - деди Сакен Толиповнинг онаси Камшат Дербисалиева Озодлик билан суҳбатда.

Унинг сўзларига кўра, январь ойида бошқа маҳбуслар билан бирга қийноққа солинган Сакен Талипов тиббий ёрдамга муҳтож. "Энди ўғлимни шифокорга олиб боришим керак. Аммо қийноқлар бўйича иш ёпилди. Адвокат шикоят қилди. Энди судда кўришлари керак", - дейди Камшат Дербисалиева.

Ўзбекистонлик этник қозоқ Сакен Талипов ўтган йилнинг кузида бир неча йилдан бери Олмаотада яшовчи онасининг олдига кўчиб келган. Ўшанда Сакен балоғат ёшига етмагани учун Қозоғистон фуқаролигини олишга улгурмаган. У Олмаотадаги турар-жой мажмуаларидан бирида қўриқчи бўлиб ишлаган. Қариндошларининг сўзларига кўра, 4 январь куни Сакен “Алмати Арена” яқинидаги тинч митингга чиққан.

Аввалроқ январь воқеаларига алоқадор ўндан ортиқ хорижлик ҳибсга олингани ҳақида хабар берилган эди. Шунингдек, Қирғизистоннинг икки фуқароси ва Ўзбекистоннинг бир фуқароси ҳалок бўлгани ҳақида ҳам айтилди. Қозоғистон ҳукумати январь ойидаги қонли воқеаларни уюштиришда айрим “ташқи кучларни” айбламоқда. Расмий хабарларда Марказий Осиё давлатларидан бирининг террорчилари ҳақида сўз юритилган, лекин мамлакат номи тилга олинмаган ва ҳеч қандай далил келтирилмаган.

Бунгача Қирғизистоннинг икки фуқароси Викрам Рузахунов ва Чўлпонбек Сидиқов тартибсизликларда иштирок этганликда айбланиб, калтакланган ва қийноққа солинган эди. Шу муносабат билан Қирғизистон Қозоғистонга норозилик нотаси юборган, шундан сўнг улар қўйиб юборилган. Ўтган ҳафта Бишкек полицияси Рузахунов январь ойида Олмаотада бўлганида оғир жароҳат олганини тасдиқлади.

XS
SM
MD
LG