11 июлда қувурдан газ узатиш техник хизмат кўрсатиш учун 10 кунга тўхтатилган эди. Европа Иттифоқи расмийлари техник ишлар якунланганидан сўнг Россия газ беришни қайта тиклашига шубҳа билдираётган эди.
Маълум қилинишича, газ узатиш аввалги ҳажмнинг 30 фоизи даражасида қайта тикланган. Техник ишлар бошланишидан олдин Россия газ ҳажмини 40 фоизга қисқартирганди. Россия президенти Владимир Путин июль охиригача газ ҳажми янада озайтирилиши мумкинлигини билдирган. У газ узатиш ҳажмини Россия Украинага уруш очгани оқибатида ишга туширилмай қолган “Шимолий оқим-2” қувури орқали ўз қолипига келтиришни таклиф қилмоқда.
Газпром 16 июнда “Шимолий оқим” қувури орқали газ беришни 60 фоизга озайтирган эди. Бунга Канадага таъмир учун жўнатилган газ ҳайдовчи турбина санкциялар туфайли Россияга қайтарилмаётгани сабаб қилиб кўрсатилган.
17 июлда Канаданинг Siemens Energy ширкати таъмирдан чиқарилган газ турбинасини Германияга жўнатди. Бу эса украин фаолларининг норозилигига сабаб бўлди.
Россия газ беришни тўхтатса Германия ва бошқа Европа давлатларида газ етишмовчилиги юзага келади ва ҳукуматлар газ истеъмолига чеклов ўрнатишга мажбур бўлади.
Россиянинг Газпром ширкати 21 июль куни эрталаб Германияга “Шимолий оқим” қувури орқали газ етказиб беришни қайта тиклади.