Байден Оқ Уйда “ўз ишини давом эттираётгани”ни айтди. Унинг иш ўрнида ишлаётгани акс этган сурат жамоатчиликка тақдим этилди.
21 июлда Байден коронавирусга чалингани хабар қилинган эди. Оқ Уй расмийларининг билдиришича, Байденда коронавирус енгил кечмоқда, шунинг учун ҳам у ўзини яккалаган ҳолда президентлик ваколатларини бажаришда давом этаётир.
Оқ Уй матбуот котиби Карин Жан-Пьер Жо Байден коронавирусга қарши Паксловид дорисини ичаётганини айтди. Бунга қадар АҚШ президенти коронавирусга қарши икки марта эмлангани хабар қилинганди.
79 ёшли Байденда кексалик оқибатида коронавирус оғир кечиши мумкинлиги ташвиш уйғотган эди. Оқ уй шифокори Кевин О'Коннор Байденда тумов, чарчоқ ва мунтазам қуруқ йўтал кузатилаётганини билдирди.
АҚШ президенти Жо Байден коронавирусга чалинганига қарамай ўзини яхши ҳис қилаётганини маълум қилди ва унинг саломатлигидан ташвишланган барча тарафдорларига миннатдорчилик билдирди.