«Амонатбанк» раҳбарияти, ўз навбатида, бу муаммолар кредит олиб, ўз вақтида қайтармаган мижозларнинг айби билан бошланганини таъкидламоқда.
Ҳисоб палатаси текширув чоғида давлат банкидаги молиявий камчиликлар аниқланганини даъво қилмоқда.
Аввалроқ, 14 июль куни Ҳисоб палатаси раҳбари Қорахон Чиллажўда «Амонатбанк»нинг айрим мижозларини қарздорликни қайтариш масаласини ҳал қилиш учун текшириш мақсадида Бош прокуратурага материаллар юборганини маълум қилганди.
“Биз аудит ўтказдик ва 18 та иш бўйича Бош прокуратурага юбордик. Прокуратура органлари томонидан кўрилган чора-тадбирлар натижасида маблағларнинг 50 фоизи қайтарилди. Бу пулнинг катта қисми жарималар бўйича фоизлардир ", - дея тушунтирди у.
«Амонатбанк» ва Ҳисоб палатаси аниқланган камчиликлар юзасидан “банк ходимларига нисбатан ҳам чоралар кўрилгани”ни тасдиқлади, бироқ бошқа тафсилотларни келтирмади.
Иқтисодий таҳлилчи Пайрав Чоршанбиев 22 июль куни ушбу ҳолатга қуйидагича изоҳ берди: “Банк ходимлари кредит беришда ҳар доим ҳам барча талабларни бажаравермайди ва бундай хатти-ҳаракатлар банк учун зарар бўлиб чиқади. Яъни таниш-билиш орқали беришади. Дўстлари, қариндошлари ёки бошқа танишларига кредит берилади ва қарз олувчиларнинг тўлов қобилияти умуман текширилмайди. Кафолат ёки кафиллик билан кредит беришда мулкнинг қиймати тўғри текширилмаган. Бу эса, албатта, биринчи навбатда банк ходимларининг айби”, - дейди Чоршанбиев.
Ўтган йили Ҳисоб палатаси ҳам «Амонатбанк»да 41 миллион сомонийдан ортиқ молиявий зарар аниқланганини маълум қилган эди. Ҳисоб палатаси аудиторларининг маълум қилишича, бу маблағ мижозларнинг рухсатисиз ҳисобварақларидан ечиб олинган. Шунда «Амонатбанк» раиси ҳам мазкур банкда маблағ йўқлиги Ҳисоб палатаси томонидан эмас, балки ички аудит томонидан аниқланганини таъкидлади.
«Амонатбанк»да аниқланган молиявий ўғирлик асосан 2018-2019 йилларда содир бўлиб, уларнинг товонини тўлаш масаласи ҳалигача якунига етмаган.
Аввалроқ Тожикистон Давлат молиявий назорати ва коррупцияга қарши кураш агентлиги «Амонатбанк» бош офисининг икки нафар ходимини ноқонуний молиявий операцияларда гумон қилиб ҳибсга олган эди. Шунингдек, улар ноқонуний валюта операцияларини амалга оширишда айбланган.
Амонатбанк Тожикистондаги йирик давлат банки бўлиб, у орқали давлат хизматчиларига пенсия ва маошлар тўланади.