Келишувга асосан иттифоққа аъзо давлатлар ихтиёрий равишда босқичма-босқич газ истеъмолини камайтиради. Газ етказиб берилишида жиддий муаммолар юзага келган тақдирда Европа Иттифоқи ҳудудида газ истеъмоли мажбурий равишда чекланади.
Мазкур режадан мақсад Россия газ беришни тўхтатиб қўйган тақдирда юзага келадиган таҳдидларнинг олдини олиш ва юмшатишдир.
Бундан бир кун аввал Газпром “Шимолий оқим” қувурига газ ҳайдаб берувчи яна бир трубинани эксплуатациядан чиқарганини билдирган. Бунга трубинанинг таъмирталаблиги сабаб қилиб кўрсатилган. Газпромнинг билдиришича, 27 июлдан бери Европага газ беришнинг бир суткалик меъёри 33 миллион кубометрга озайтирилган.
“Шимолий оқим” қувурининг кунлик газ ўтказиш қуввати 170 миллион кубометрни ташкил қилади. Интерфакс агентлигининг ёзишича, айни пайтда мазкур қувур қувватининг 40 фоизи даражасида ишламоқда.
Европа Иттифоқи энергетика вазирлари 2022 йилнинг августидан 2023 йилнинг мартигача газ истеъмолини 15 фоизга қисқартиришга келишиб олди. Ўтган ҳафтада Европа комиссияси мана шундай таклифни киритган эди.